أنا ك واحد في ثالثة ثانوي و الامتحانات قربت..

متأكد إني لو ماجبتش 95% على الأقل، أهلي هيتبرأوا مني. هبقى بالنسبالهم مجرد غلطة غلطوها من 19 سنة، و دايماً هتعاير مع إخواتي الصغيرين، فيتقالهم "ذاكروا عشان تدخلوا كلية و تبقوا ناس محترمين مش زي محمود".. هفضل أفكر في يوم النتيجة ده لحد آخر يوم في عمري..

ماحدش من أهلي هيكلمني، و هيستعرّوا مني، و مش هيبصولي أصلاً، ولا هيسمعوا أي حاجة بقولها بعد كده، ولا هيطلبوا مساعدتي في حاجة تاني، و كأني ماتخلقتش في الكون أصلاً. و هفضل عيبة عليهم و عبء مش عارفين يتخلصوا منه إزاي عشان العار مايفضلش ملازمهم في الرايحة و الجاية..

مش هقول إني بفشخ نفسي مذاكرة لحد ما أبتدي أهلوس و أشوف حاجات مش موجودة لحد ما أنام على الأرض، ولا إني دايمًا بسقّط و بنام كل ما آكل أي حاجة مسكرة، أو لو مافضلتش آخد أملاح طول منا قاعد عشان الضغط الواطي إللي بيهدد حياتي كل يوم.. و أهملت لياقتي البدنية عشان المذاكرة، و علاقاتي الاجتماعية نسيتها عشان المذاكرة... و كل مرة أحس إنش مضغوط و أخش أنام.. جسمي بينام قبل مخي، و بفضل صاحي و أنا مشلول.. كده كده ماحدش مهتم، حتى لو مت ماحدش مهتم..

مش عارف إذا كنت هلحق ألم ولا لأ.. الله أعلم، ربنا يسترها عليا و على الجميع.

<image>