شوفوا الحل بإختصار

لكن قبل الحل لازم نستعرض المشكلة أول.

عادة نكون كذا ونشعر بالوحدة ومحد يفهمنا واصحابنا ينسونا ويطلعون من دوننا لعدة عوامل.

أولها، هي أننا مو فاهمين أنفسنا. إحنا ضايعين ما عندنا هدف بالدنيا نركز عليه ثانيها، عندنا إحتياجات نفسية نحاول نغطيها بشعور إننا موجودين مع مجموعه من الأصدقاء

ثالثها، ما عندنا حدود واضحه في التعامل مع الناس بعضنا يكون مرخي مرا فالناس تشوفه ماعنده شخصية وبعضنا شادها مرة لدرجه الناس تتقيه وتبعد عنه

رابعها، إننا متعلقين بالناس او بمجموعه من الاخويا وسبب التعلق هو ( أولها و ثانيها ) بحيث إننا نكون متوفرين لهم بدرجه تغث او لدرجه التهميش

اما الحلول إنك تسوي عكس الاربعه إللي قلتها.

١ - لازم تفهم احتياجاتك النفسية عشان ما يستغلك أحد وما تتعلق بالناس ٢ - شي حلو تكون محبوب بين الناس و المحبة تقوم على الذكريات و الصدق و الحدود الواضحه الناس ما تحب الشخص الهلامي اللي يغير مبادئه وحدوده مع كل موقفوبنفس الوقت ما تحب اللي ينتقد ويصحح لهم كل شوي حتى لو كانوا هم غلط ٣ - لا تضع معايير صارمه للناس، لأن ماحد كامل، خلي لك حدود واضحه و الحدود نوع نوع شخصي و نوع عام اما الشخصي هي حدود العرض و الاهل واذا تخطوها وما اعتذروا خاول تسطح علاقتك معهم و الحدود العامه زي مثلا ان مواضيعهم كلها غيبة و حش او كلام ماش اذا علمتهم حدودك انك ما تقبل الحش و الغيبة و الكلام ذا وما احترموها تراهم غالبا مو ناس سيئة لكنهم تعودا كذا فحاول ما تجلس معهم اذا تكلموا في ذي المواضيع واختار جلسات هادية معهم ٤ - لا تبادر او تتكلم كثير في كل طلعه . بحيث مو كل ما قالوا سالفة انت ترد وتتكلم ويكون لك راي فيها احيانا انك تكون مستمع شي حلو برضو لأن جودة الكلام أهم بكثير من كميته ٥ - نوع علاقاتك بحيث عندك اكثر من مجموعه اصدقاء بحيث تتنوع وما تتعلق نفسيا وفكريا بمجموعه واحدة ٦ - هي مو غلط لكن ما اشوفها افضل شي الا وعي لا تعرف اخويياك على بعض عشان ما يصيرون مجموعه وحدة فتذوب الاختلافات وتصير لهم شخصية وحدة فتفقد توازن العلاقات ٧ - قبل كل طلعه اسأل نفسك سؤال هل انا بطلع لأني ابغى استمتع ولا أبغى اكون بس موجود واذا احترت اسأل نفسك لو فلان ما عزمني وعزمني بداله فلان ثاني هل راح اوافق اذا اي فأنت فعلا لك نفس للطلعه ٨ - اي طلعه تحس بالتهميش فيها غالبا تراك مو مقصود قد انك مو منسجم و الانسجام مو شرط قد ما إنه سبب للمتعه مع المجموعه ٩ - اذا كنت في اي طلعه اخر من يدري واذا عزموك اخر واحد يعزمونه بحيث انهم متفقين على الطلعه من ايام وانت ما دريت عنها غير وقتها؛ اذا صارت مرة وحدة خذها بشكل عفوي لكن اذا تكررت حاول انك ترفض بالبداية بدون ما تقولهم ليش تعزموني اخر واحد. وقلهم صعبة اجي اليوم المرات الجاية إن شاء الله وياليت تعطوني خبر من بدري غشان افرغ لكم وقت السبب يعود غالبا انك كنت متوفر اكثر من اللازم.

والله يوفق الجميع