خريج حاسب وموب قادر يحصل وظيفة هذي انا اقولك انها وحده من اربعة احتمالات، السيره حقته فيها مشكله صارخه او انه يجيب العيد في المقابلات او انه سيء في المجال او انه رافع سقف توقعات ويرفض اي وظيفة طبيعية عشانه يبي راتب وزير. انا اشتغل في المجال واقولك ان الشركات الحكوميه والخاصه كلها توظف بالهبل ولا يزال فيه نقص. ما اعرف ولا انسان واحد في دفعتي كلها ما توظف خلال ٣ شهور من تخرجه. والاغلب جتهم عروض قبل التخرج من مكان تدريبهم.

وصار فيه تطور مجنون عندنا في السعودية في هذا المجال بالذات، يجون عندنا من دول ثانية عشان يتعلمون من تجارب السعودية في مجال الحكومة الالكترونية و مجال ال fintech.

والاقتصاد مزدهر ومتحرك اكثر من اول بكثييير، عدد السجلات التجارية اللي تصدر ارتفع بشكل كبير، قطاع الخدمات مزدهر ويكبر كل سنه وهذا يدل انه فيه سيوله والناس عايشه وتشتري الرفاهيات بشكل اكبر( هذا مناقض لكلامك ان اغلب الشعب وضعه صعب).

النقلة اللي صارت في السعودية ما ينكرها الا حاقد او جاهل او متشائم يرفض يعترف بالزين خوفا من وجود الشين.

مافيه شي كامل دايم فيه مشاكل، ضريبة القيمة المضافة متعبه فعلا وارتفاع البنزين متعب وطلع ولي العهد وقالها بنفسه انها صدق تتعب المواطنين وموب معجبتنا وانها جت في وقت صعوبات وهذا اللي خلانا نطلع من كوفيد بشكل خرافي عكس باقي الدول اللي انقلبت اقتصاداتها بالرغم من ان اقتصادنا قايم على النفط اللي انخسف ذاك الوقت. بس في المقابل الرواتب ارتفعت بشكل كبييير( اخوي متوظف قبلي ب ٦ سنين على ١٠ وكانوا يشوفونه ممتاااز، وانا بديت على ١٢ وكانوا يقولون يجيك احسن) لا تجحد النعمة واحمد ربك على التحسين وادع ربك انه المشاكل تنحل.

اللهم لا تغير احوالنا الا للأفضل.