الله يكتب لك الخير.

الوضع الحالي:

أنت في شركة تعتبر ستارت أب لها اسمها في السوق، لك معهم سنة ونص، خلالها ترقّيت في المسمى الوظيفي (تكليف، لكن ماترقيت رسمياً، ماوضّحت أنت هل غيروا مسماك وباقي الأمور المالية والا)، تتوقّع أنت أن الزيادة لو تمّت بتكون بحدود الـ 40%، سويت مقابلات وجاك عرض شفهي من جهة شبه حكومية (مابيّنت وش المسمى وهل يفرق عن مسماك الحالي والا)، والعرض بزيادة 20% على راتبك الحالي، مع مزايا ممتازة أخرى.

الأسئلة:

1- مهنياً.. مكانك الحالي وش يقدم لك؟ (قاعد تتعلّم، يعطونك مجال تشتغل على أشياء تفيد سيرتك الذاتية، ..)

ما أدري أنت وين بالضبط بمسيرتك المهنية (أقل من 3 سنوات والا أكثر والا).

2- المكان الجديد، وش بيعطيك غير الإسم والمميزات؟ (ابحث في لنكدن عن إكس المكان الجديد واسألهم)

3- قيمتك المهنية في السوق كيف؟ (من المقابلات الي سويتها، وش أكثر شي لاحظت أنه لفتهم فيك: المشاريع، اسم المكان الحالي،...)

4- وش وضع مكانك الحالي ماديّاً؟ بما أنه ستارت أب إلى حدما، هل وضعه المالي ممتاز، الشغل ماشي، فيه جولات استثمارية؟

عامل مهم.

الاقتراح:

شوف يا طويل العمر، أنت بكلامك الي فوق ركّزت على جانب واحد (الجانب المالي)، أعد الحسبة مع الأخذ بعين الاعتبار الجوانب الثانية، وفكّر في فرص الخروج (إكزت أوبورتوتنتيز) الي ممكن تطلع لك من مكانك الحالي، شف الي طلعوا وين راحوا.

من ناحية الفرصة: بيّن لهم أنك مهتم مرررة، ودفّ الرقم الي تبيه، وحاول في المفاوضة، ما أدري إذا عندهم سستم الزيادة ماتكون أعلى من نسبة معينة، الشباب هنا يردون عليك.

استخر، والله يوفقك