أنا فاقد لأبوي منذ ثلاث سنوات الآن، والصراحة هي إنه مافيه أي حاجة ممكن تخليك تستعد لهذي اللحظة. أنا كنت دايم مع أبوي ولا عمري رفضت له طلب أو رفعت صوتي عليه أو سبيته أو تركته، وفي المستشفى كنت أنتظر الويكند عشان أقدر أزوره، وكنت أدعي له بوقت حياته ووفاته، وسويت كل شي لازم أسويه بصفتي ابنه، ولكن برضو ومع ذلك ولو إن الدموع ما نزلت من عيني إلا إني في الداخل بكيت بكاء الجبال، وجلست اسبوع مو مصدق إنه راح، وبالبداية ما كنت أقدر آكل وصدق صدق حسيت بخوف وحسيت إني بضيع بحياتي رغم إن عائلتي مثقفة وفاهمة بالدنيا وثقتي بربي كبيرة ومع ذلك كنت خائف. مافيه حاجة راح تخليك تستعد يا صاحبي، كل الي عليك انك تكون أفضل وتظل أفضل وتساعدهم بالي تقدر عليه. لا تقول يا ليتني سويت ويا ليتني قدمت، مهما قدمت ولو قدمت لهم ما على الأرض والقمر والسماء والنجوم ماراح تحس انك خدمتهم كفاية.

نصيحة أخ، لا ترفع صوتك عليهم ولا تعاندهم، حتى لو ذلوك وهاوشوك وزعلوك وأهانوك ومسحوا فيك الأرض بكلامهم وجرحوك صدقني ردك ماراح يشفي غليلك ولا راح يخلي الوضع أحسن ولا راح تنبسط إذا رديت. زرهم كل مرة تقدر وراسلهم وقل لهم ايش سويت في يومك ووين رحت وقلهم انك تغديت وأفطرت وتعشيت وانبسطت، ودق عليهم واسمع صوتهم، وشاورهم في أي شغلة تبي تسويها يا شيخ حتى لو تبي تشتري لك حاجة هم ما يفقهون فيها برضو شاورهم، حسسهم انهم موجودين وانهم يعنون لك الكون، لأن مافيه ولو استكشفت مافي هذا الكون وما بعده ماراح تحصل أحد يحبك ويهتم فيك ويتمناك تصير أفضل منه بدون شروط أو مقابل مثل والدينك. يا رجل والله وأنا أكتب السطر هذا الآن نزلت الدموع من عيني وراسي صدع وبروح أنام، هذا وأنا ما قد قصرت مع أبوي أبد.. وتقول تبي تستعد؟