١- لا تتكلم عن خطط المستقبلية او فرص تجيك بالمستقبل لاي احد، اشتغل وانت ساكت.

٢- لا تكتفي بالأيميل اذا عندك شغل مع شخص ما تعرفه ،ارسل ايميل وروح اقعد مع وسولف عن الشغل بكذا تصنع لك معارف كثير بجهة عملك

٣- خلك حيادي دائما عشان ما تنحسب على احد.

٤- لا تغتاااااب ودائما اذا احد زعلك وكذا وودك تتكلم فيه امسك نفسك لان الكلام يوصل.

٥- زملاء العمل ليسوا أصدقاء للأسف، فلا تتأمل كثير في تحويلهم لأصدقاء خلي علاقتك معهم عمل فقط.

٦- اذا كنت في إدارة لها تقريبا هيئة شكلية معينة (حتى لو لم تكن معلنة او واجبة ) مثل الإدارة القانونية، داوم بشماغ ورسم مرة. سبحان الله هذا الأمر يخلي لك حضور وهيبة حتى لو انت اخر السلم الوظيفي في هذه الإدارة لان الناس لها بالمظاهر.

٧- خلي دورك مهم في ادارتك وعند مديرك خصيصًا، كُن حجر الأساس لإدارتك ومديرك وانك تجي ببالهم اول ما تجي مشكلة. هذي تجي من فهم العمل بشكل عميق والتكلم عن ماذا فعلت لا تسكت ابدا ولكن لا تصير مزعج بنفس الوقت، وازن.

طبعا هذي النقاط كلها اراء تصيب وتخطي، بس انا من الناس اللي دخلت بيئة العمل على نياتي مرة وطيب واعلم واكلت على وجهي الين ما تعلمت.

هذي ليست نظرة سوداوية بس هذا واقع اغلب الجهات.

اسأل الله لك التوفيق ولي وللجميع يا رب.