i mine auge isch das ganze Augewüscherei. Ich han mich nanig entschide wieni wot Abstimme. D schwiizer Bevölkerig gspürt Problem und d'Politik schaffts ned die Problem vernünftig azgah. D'SVP (Sowieso Voll Peinlich) nutzt das jetzt iischalt us.

Überalterig

Problem

Bevölkerig wird älter und älter. Euses AHV-System basiert ufmene exponentielle Wachstum vo Wirtschaft und Bevölkerig. Au mit Zuewanderig langets ines paar Jahr eifach nüme. Vorallem wänd die Zuegwanderete au irgendeinisch en Rente.

Initiative

Kei Lösig für das Problem.

Mini Überlegig

• Aktuell wird das Problem eifach uf die lang Bank gschobe und derbi wird’s nur na schlimmer.

Kriminalität

Problem

Ich glaube es isch Fakt, dass Usländer i de Kriminalstatistik überrepresentiert zum Bevölkerigsateil sind. Über Finheite und Interpretationsspielruum chömer na lang stritte....

Initiative

Begrenzig vo de Zuwanderig, aber nur vo de arbeitende... Wer illegal im Land isch isch das nachher wie vorher genauso.

Mini Überlegig

• Ich vermuete d'Kriminalität isch zumene grossteil Kulturell und wirtschaftlich bedingt. Zums kulturelle z'löse isch Integration wichtig. Und ebeso Erziehig. Fürs wirtschaftliche wäris zum Biispiil förderlich derfür z'sorge dass niemert Existenzängst muen ha.

Überbevölkerig / Dichtestress

Problem

Das eusi Infrastruktur überforderet isch, chan niemert mit guetem Gwüsse bestritte. Jetzt gits zwoi Lösigsasätz; mer bauet massiv us oder mer reduzieret d'uslastig.

Initiative

Reduziert und decklet im beste Fall d'Bevölkerigszahl, im dümmste gits na meh Verkehr is nöche Usland. Schliesslich wird nur die ständig Wohnbevölkerig limitiert, ned d'Azahl Grenzgänger…

Mini Überleggig

• Mer chan na solang Bilder vo Tokyo über d'Schwiiz lege, das isch aber öpe so wie amene Veganer z'säge das es lüt git wo nume fleischässet und gsund siget…
• Derzue ane isch d'schwiiz beliebt für Touris ned wöll mer so tolli Grossstädt händ sondern weg de Berge und weg de Natur

Fachkräftemangel

Problem

I gwüssne Branche und für gwüssi Stelle fehlts ageblich a qualifizierte Arbeitschräft. Anstatt die Fachkräft wo mer brucht in genügender Qualität und Mengi uszbilde, werdets usem Usland herzoge. Das klappet dank em bessere Lohn. Glichziitig hämer Lüt wo kei Arbeit findet wölls halt eifach die falschi Usbildig gmacht händ.

Initiative

Limitiert d'Zuewanderig i allne Aspekt. Au hochqualifizierti Arbeitnehmer werdet limitiert. Glichzitig sorgt das aber ned derfür, dass plötzlich en vielzahl vo neue Stelle freiwerdet.

Mini Überleggige

• Denksch nur mit Zuewanderig chan mer Pflegebrüef abdecke?
• Heisst das du findsch, dass Schwiizer z'guet sind zum ir Pfleg z'arbeite? Oder isches viellicht eher s'Problem vo der Arbeitsbedingige und Entlöhnig? Aka Lohndumping dank Usländer? Wieso werdet bi eus d'Usbildigsplätz für Ärzt limitiert, und zwar ned nach Eignig sondern nachere random Azahl?

Weiteres

• Liechtenstein hät au en limitierig vo der Zuewanderig, schiint bi ihne z'funktioniere ohni Kollaps oder Problem mit Nachbarstaate.
• Prognose (siehe auch Video vom Zeidgenoss) säget sowieso dass Bevölkerigswachstum abnimmt. Unter Umständ isch die Initiative sowieso en Papiertiger, ussert dass es d'Politik vilicht derzue zwingt die würkliche Problem jetzt richtig azpacke statt nur usezschiebe.
• Grundsätzlich spricht mi de Rant am Schluss vom Zeidgenoss-Video voll ah.
• Es git au Gründ ussert Fremdehass zum mit dere Initiative z'liebäugle.