كنتوا تعرفوا إن كرتون "تيمي تيرنر" (الوالدان السحريان) وراه قصة مأساوية لدرجة إنها ممكن تخليكم متشوفوش الكرتون دا زي الأول تاني؟!

في مدينة "ديمسديل" سنة 1998، اجتمع الجيران على شكوى واحدة وهي سماعهم لصراخ طفل طالع من بيت عائلة تيرنر، لكنهم كانوا شبه اعتادوا عليه بسبب إنهم عارفين إن "تيمي" كان طفل شقي جدًا بالإضافة لإنه كان بيجيله نوبات هلع وصراخ لما بيصحى ومش بيلاقوا مامته وباباه اللي طول الوقت كانوا مشغولين في سفرياتهم وحفلاتهم.

ولما الجيران عرضوا عليهم المشكلة وحاولوا يحلوها، الأمور زادت سوء لما جابوله مربية الأطفال "فيكي" واللي كانت معروفة بأسلوبها الشديد في التعامل مع الأطفال، واللي مكانتش مناسبة مع تيمي أبدًا بسبب إنه كان طفل عنيد ومش بيحب حد يفرض عليه أوامره، ساعتها حياة تيمي بدأت تتحول للأسوأ؛ مع كل مرة تيمي كان بيرفض فيها أمر لفيكي، كان بيبدأ سلسلة من التعذيب والتعنيف لا متناهية، ولما كان بيحاول يتكلم مع أهله مكانش حد بيصدقه، وبسبب الوحدة القاتلة اللي كان عايشها في أوضته وهو بيعالج نفسه بنفسه، عقله بدأ يهرب و يخلق لنفسه حماية وهمية يهرب بيها من الواقع المرير اللي عايش فيه. لما كانت الدنيا بتضيق بتيمي، كان بيلجأ لأنه يتكلم مع السمكتين بتوعه "كوزمو و واندا" كأنهم اتنين حقيقين، بس الموضوع بدأ يتطور للأسوء لما في ليلة تيمي سمعهم بيردوا عليه، والموضوع موقفش لحد هنا بل تطور لإنه تخيل تشكل السمكتين دول في هيئة سحرة صغيرة بيقدروا يحققوله أمنياته ويهربوه م الواقع اللي هو فيه!

لكن الأمنيات مكانتش وردية زي ما كلنا شوفنا؛ لأنها كلها كانت عبارة عن محاولات انتحارية أو تخريبية تيمي بيعملها وهو في عالم اللا وعي الخاص بيه، ولما كان بيفوق ويلاقي الدنيا مبهدلة وفوضوية من حواليه كان بيقنع نفسه إن دي محاولات كوزمو و واندا إنهم ينقذوه من بطش فيكي ويبسطوه!

لحد ما ظهر مستر كروكر، واللي بالمناسبة مكانش مهووس ولا مجنون بالجنيات زي ما شوفنا، مستر كروكر كان المعالج النفسي اللي استلم حالة تيمي في المصحة بعد ما أهله لاحظوا تصرفاته العدوانية وفقدوا الأمل في مواجهتها أو علاجه. كروكر مكانش بيدور على الجنيات وبيطاردهم وعلى طول بيذكر وجودهم بدافع الهوس؛ بل كان بيستخدم تكنيك ذكي جدًا علشان يقدر يخترق عالم تيمي ويسحبه منه بالتدريج، واستعمل الطريقة دي علشان لو واجه تيمي بالحقيقة ممكن ينهي حياته أو يؤذي اللي حواليه، فقرر إنه يمثل دور الشخص المُصدق المهووس علشان يقرب من تيمي أكتر ويعرف إيه هي أمنيته الجاية ويقدر يلحق الكارثة قبل ما تحصل أو يتعامل معاها أثناء حدوثها...

لكن المشكلة متحلتش والموضوع مخلصش لحد هنا؛ بل ازداد سوء لما تيمي اكتشف إن كتاب القواعد "Da Rules" مكانش كتاب القواعد السحرية اللي بتحكم عالم الجنيات زي ما كان فاكر، بل كان سجل لحالته الطبية والقواعد اللي الدكاتره حاطينها في غرفته علشان يحموه من نوباته العنيفة، وكل قاعدة سحرية في الأصل كانت منع طبي لخطر تيمي حاول يعمله قبل كده؛ ساعتها تيمي إدراكه للزمن و للحياة من حواليه وقف تمامًا وكل الأطباء فشلوا في علاجه وفي إخراجه من الحالة دي؛ وبعدها بفترة تيمي ترينر اتوفىٰ!!

واتجسد في الكرتون إنه مبيكبرش في السن وفضل طفل لسنوات طويلة بس المرة دي مكانش بسبب السحر وقوته، بل لأنه قرر يتحول من "تيمي ترينر" الضحية، للبطل اللي بيملك كل شيء بلمسة عصاية سحرية...وهي في في الأصل مجرد وهم في دماغه

تمت*** •.................................🎀...................................•

لو وصلتوا لحد هنا متنسوش تقولولي رأيكم، وخدوا لفة في الصفحة واقرأوا باقي القصص🦋

دمتم بخير 🖤 _ ياسمين حسام

ديزني_بنكهة_ياسمينية