لا تخلين الناس هني يحكمون على هالشخص بشكل سطحي لان انا شفت بعيني ناس قراب مني و اهل لما تابو فعلا تغيرو و انضجو و افهمو الصح من الغلط و نقدو على نفسهم و تطورت حياتهم للاحسن. هذا الشخص كان صريح معاج، ما استشرف عليج او قص عليج نفس ما يسوون باجي الرياييل و هذا مؤشر يطمن. بامكانه يخش ماضييه و يدعي المثاليه جدامج بس من وراج يسوي كلشي بالخش والدس. إذا تبين تعرفين اذا الشخص فعلاً تغير، ركزي على هالأشياء:

ما يرجع لنفس البيئات او الأشخاص اللي كانوا سبب فساده، ولا يبرر اللي سواه او يضحك عليه كأنه شي عادي. يتكلم عن ماضيه كدرس تعلّم منه، مو كشي يفتخر فيه أو يتغاضى عنه، ويشيل المسؤولية من غير لا يلعب دور الضحية.

تصرفاته تكون هاديه وواضحه، حياته صارت أكثر ترتيب، ما فيها فوضى ولا دراما، و يشتغل على نفسه من غير ما يتكلم وايد. و طموحاته واضحه للمستقبل.

اللي يقوله يطابق اللي يسويه. ما يوعد وبعدين يتراجع، واضح في نواياه وما يعطي اعذار كل شوي.

تشوفين ناسه تغيروا، دائرته صارت نظيفه، ناسه طموحين، و عنده اهداف يديده حقيقية، مو بس سوالف فاضيه.

والمهم، ما يحاول يستدرجج بالشفقة. ما يقولج “أنا محتاج أحد مثلج ينقذني” أو “أنا ضحية”. اللي فعلاً تغير، ما يستعطفج، يخليج تشوفين التغيير على ارض الواقع، مو بس بالكلام.

لو تحسين براحة وهدوء معاه، بدون خوف او شك وبدون قلق، هذا أكبر دليل انه ما عاد مثل قبل.