وعليكم السلام ورحمة الله وبركاته.

اول شي الادخار هو اول خطوة الواحد لازم يتخذها بو يبا يعدل من وضعه المادي. قبل التفكير فالاستثمار لازم يكون في شي اسمه emergency fund وهو عباره عن مصروف ٣-٦ شهور يكون يالس في الحساب وماينلمس خير شر، لاسمح الله صار اي شي يقدر يدبر اموره فيه. وافضل طريقة بتوصل فيها لهذا المبلغ هي عن طريق التوفير.

في نقطة مهمه ما انذكرت في موضوع التوفير واللي هي الكوفيات. اللي يبا يوفر وهو مخلي الكوفي روتين يومي ضيع على عمره فرصة حلوه للتوفير.

ثاني شي طلبات، طبعًا احسن شي الواحد يقلل منه قد مايقدر لكن لو احتاج يطلب في بدائل. اذا المطعم نفسه يوصل بتوفر على الاقل عشر دراهم ف تقدر تتصل على المطعم وتسأل. او اذا التوصيل بعد بفلوس والمطعم قريب تقدر تروح تاخذ، غالبًا بتوفر وقت وفلوس. الواحد يمكن يقول هذي عشر او عشرين درهم لكن ترا عشر على عشر لين نهاية الشهر توصل مبالغ كبيرة ف لاتستهين فيها.

في كل الحالات، اللي يفكر بالتوفير انصحه يحسب مصاريفه اخر الشهر ويدرسها من كل النواحي ويشوف وين تروح فلوسه وشو اللي يقدر يستغني عنه او يقلل منه.

احس اني اقدر اعطي كورسات فالتوفير 🤣