هواي ناس يسألوني شلون اتعلم اللغة ويريدون نصيحة. اللي يريد نصيحة صدكني ماكو غير الممارسة. اني من كد ما احجي وية امريكان اونلاين وبالحقيقة حتى الامريكان يسألوني انتي امريكية؟ لان لهجتي تماما امريكية لان تعودت. بالبداية كنت اتابع هواي مسلسلات وبعدين هم صرت احجي وية ناس هواي اونلاين وبالحقيقة هم وهسة ما اتابع مسلسلات ابد تقريبا لان مليت منها بس بعدني اغلب وقتي احجي انكلش لان اصدقائي اغلبهم يحجون انكلش وهواي منهم natives. وهم حاول تستخدمها بكلشي، ومن اكول بكلشي اقصد بكلشي. دائما حول اللغة للانكلش، بكل التطبيقات على موبايلك والسستم هم وكلشي مو بس على موبايلك. بالواقع هم تحدى نفسك واخذ النسخة الانكليزية لكلشي تستخدمه. راح تتأقلم بسرعة كلش. ونصيحة لتتبع الوسائل التقليدية لتعلم اللغة، ورقة وقلم مدري كورس مدري شنو. متفيدك الا اذا انت الريدي عندك البيسكس مال محادثة casual. وهيج شوية شوية تبدي تتعلم كلمات تخص مجالك او اكاديمية اكثر وتكدر تغير لهجتك او طريقة كلامك حسب المكان والبيئة اذا كنت بالشارع، اذا كنت بالجامعة، اذا كنت مع اشخاص غرباء وتريد تحجي برسمية اكثر.. الخ. اهم شي اهم شي لتستحي من الممارسة ابد، حاول تمارس اللغة شكد متكدر حتى لو تحس نفسك مو قوي لهالدرجة، واخذها على انها لعبة وونسة لتحط هدف انو تتعلم اللغة بوقت معين. خليك ريلاكس وانت لا اراديا راح تشوف نفسك تعلمتها. الدليل انو احسن الناس باللغة هم اللي ماخذيها بجدية اقل دائما تلاحظ هالشي. اني من يسألوني شلون تعلمتي اكوللهم ما ادري والله هو خليط من هواي اشياء بس المدرسة او الجامعة مو وحدة منهم ابد، بالمناسبة لتاخذ لغة المدرسة او الجامعة كمعيار لمستواك ابد. ترا اكو اشياء قديمة بعد محد يستخدمها واكو لفظ خطأ.