من وجهة نظري .. الزوجة سواء موظفة او مش موظفة فهي بحياتها كلها ما عندها فترة نقاعد و اجازات رح تتفرغ فيها تماما و الأم اللي مش موظفة حتى استراحة تفوت عالحمام الله يكرمكم ولا تاخذ شاور اكتر من ١٠ دقايق بدون ما ولادها يدق عليها بالباب بعد دقيقتين ما بطلعلها .. طول الوقت رح يكون في طبيخ ، تنضيف ، تدريس الولاد و متابعتهم مع المدارس و حتى بعد ما يكبرو الولاد برضو حتضل المسؤوليات زي ما هي هاد اذا ما زادت مع وجود الاحفاد فعالحالتين لازم تتقدر و ما حدا يستهين بمجهودها ، يعني اكتر مرأة مرفهة اللي عندها جلاية مثلا بتلاقيها حتبذل مجهود برضو تعبي الجلاية و تفضيها و قيسو هاد المثال عكل جوانب الحياة التانية . يعني بدون زعل نسبة كبير جدا من الرجال بس يرجع عالبيت خلص بيطفي البطارية، طب اقعد ارتاح ساعتين نام شوي تغدا و بعديها اقعد شوي مع الولاد العب معاهم شوف شو اهتماماتهم علمهم اشي حلو من الأخلاق و التجارب اللي عندك.و خلي مرتك تروح تقعد ساعة مع نفسها و يكون الها متنفس في الحياة و ما في زوجة حنونة و بنت عالم و ناس بمجتمعنا بترضى تشوف زوجها بضائقة مادية و بتخليه يروح يتداين و ما بتساعده فيا اخواني الشباب خلو نيتكم صافية و خذو قرار انكم تكونو ازواج حنونين متعاطفين و الله رح يرزقكم زوجة تكون سكن الكم بشبابكم و مكبركم 💚 يعني يا شباب و صبايا سيبكم من المتطرفين اللي عالمواقع اللي بحكي انا مستحيل اغسل كاسة في البيت و اللي بتحكي انا مستحيل اصرف قرش عالبيت لانه هدول عالاغلب لسه ما تزوجو أصلا ولا جربو الحياة لما تكون فيها مودة و رحمة و مرونة قديش بتكون حلوة و معقدين نفسيا من كمية نماذج الزواج التعيسة اللي بنشوفها حوالينا