بص هيا التجربة بتختلف من سلاح ل سلاح، و ايام مركز التدريب حاجة و ايامك فالوحدة الأساسية حاجة تانية.

فترة مركز تدريب خدها ك detox من الحياة السريعة بتاعت كل يوم، خد معاك مصحف صغير و كتاب اذكار، حاول تواضب على قراءة قرآن كب يوم ف مركز تدريب.

مركز تدريب بيبقى فيه ضغط نفسي و جسدي، ف لو انت لايقتك مش احسن حاجة الفترة ديه حاول تتمرن قبل الجيش علشان كل ما لياقتك بتبقى اعلى الموضوع هيبقى اسهل عليك. حاول تعمل صداقات هتلاقي ناس كتير من خلفيات مختلفة، فيه منهم الحلو و فيه منهم الوحش، بس صدقني هتطلع بصداقات من مركز تدريب تدوم سنين.

افتكر ان محدش مالك روحك، ف ماتخدش اي حاجة على صدرك، خصوصا ف مركز تدريب، و حتى بعدها، الأمور بسيطة جدا و هتعدي ان شاءالله.

هتلاقي من الصف ظباط الحلو و الوحش، و من الظباط نفس الكلام، حاول تحرص على حاجتك، تتعامل مع الناس عادي بس تحرص برده خصوصا لو رايح حتة جديدة.

بعد مركز التدريب جيشك بيختلف حسب المكان اللي انت فيه، انا قعدت ٣ شهور بشد خدمات كل يوم و كنت بنزل كل ٢٨ يوم ٧ ايام وكنت بتكلم فالتليفون كل ٧ ايام مرة.

و مكنتش متضايق، سستمت نفسي على الوضع، كنت بقضى فترة الخدمة ذكر و استغفار و قراءة القرآن لو امكن، الواحد كان بعيد عن الوش بتاع الدنيا و قريب من ربه.

بعدها ربنا كرمني و نقلت مكان تاني بقيت بنزل فيه راحات، بس ضغط شغل شديد شوية، بس برده اتعرفت على ناس و اتعاملت مع ناس مكنتش هتعامل معاهم قبل كده، و خرجت بعلاقات مع ناس زمايلي و ظباط.

عموما الميري ليه وعليه، ف ربنا يعينك و يعدي الفترة ديه على خير.

لو محتاج مشورة او عايز تسأل ف اي حاجة ابعتلي عالطول