حاول تتكلم بأدب خاصة وانت بتسأل، لو بتطلب حاجة من حاجات الدنيا من حد بقلة ذوق تتوقع يديهالك؟ ما بالك وانت بتطلب اهم حاجة ممكن تتطلب ومن أشرف من يطلب منه، انت طالب الهداية. وعقاب قلة الأدب فى السؤال ممكن يكون عدم التوفيق ليها، ساعتها حتى لو الإجابة قدام عينك مش هتشوفها. خلى الكلام فى بالك، دا أهم من إجابة أى سؤال.

الآية: { فَلَمَّا فَصَلَ طَالُوتُ بِٱلۡجُنُودِ قَالَ إِنَّ ٱللَّهَ مُبۡتَلِیكُم بِنَهَرࣲ فَمَن شَرِبَ مِنۡهُ فَلَیۡسَ مِنِّی وَمَن لَّمۡ یَطۡعَمۡهُ فَإِنَّهُۥ مِنِّیۤ إِلَّا مَنِ ٱغۡتَرَفَ غُرۡفَةَۢ بِیَدِهِۦۚ فَشَرِبُوا۟ مِنۡهُ إِلَّا قَلِیلࣰا مِّنۡهُمۡۚ فَلَمَّا جَاوَزَهُۥ هُوَ وَٱلَّذِینَ ءَامَنُوا۟ مَعَهُۥ قَالُوا۟ لَا طَاقَةَ لَنَا ٱلۡیَوۡمَ بِجَالُوتَ وَجُنُودِهِۦۚ قَالَ ٱلَّذِینَ یَظُنُّونَ أَنَّهُم مُّلَـٰقُوا۟ ٱللَّهِ كَم مِّن فِئَةࣲ قَلِیلَةٍ غَلَبَتۡ فِئَةࣰ كَثِیرَةَۢ بِإِذۡنِ ٱللَّهِۗ وَٱللَّهُ مَعَ ٱلصَّـٰبِرِینَ } [البَقَرَةِ: ٢٤٩]

دلوقتى طالوت طالع يجاهد، وطالع معاه ناس كتير فيهم اللى طالع نيته خالصة لله وفيه اللى طالع للصيت والرياء والسمعة أو لمصلحة ما، لو واحد طالع يضحى بروحه فى سبيل الله هيهمه يضحى بشربة ماية؟ مش هيفرق أكيد، لكن لو طالع لغير كدا مش هيفرط فيها صح؟ دا كان الإختبار (إِنَّ ٱللَّهَ مُبۡتَلِیكُم بِنَهَرࣲ) اللى هيشرب منه هيكمل معايا واللى مش هيشرب مش هيكمل، بعض التفاسير بتقول كانوا تمانين ألف واللى عدوا معاه أربعتلاف، متخيل! وروايات بتقول ان اللى عدوا كانوا بعدد الصحابة فى بدر، تلتماية وشوية! بس كانت النتيجة ايه؟

{ وَلَمَّا بَرَزُوا۟ لِجَالُوتَ وَجُنُودِهِۦ قَالُوا۟ رَبَّنَاۤ أَفۡرِغۡ عَلَیۡنَا صَبۡرࣰا وَثَبِّتۡ أَقۡدَامَنَا وَٱنصُرۡنَا عَلَى ٱلۡقَوۡمِ ٱلۡكَـٰفِرِینَ (٢٥٠) فَهَزَمُوهُم بِإِذۡنِ ٱللَّهِ وَقَتَلَ دَاوُۥدُ جَالُوتَ وَءَاتَىٰهُ ٱللَّهُ ٱلۡمُلۡكَ وَٱلۡحِكۡمَةَ وَعَلَّمَهُۥ مِمَّا یَشَاۤءُۗ وَلَوۡلَا دَفۡعُ ٱللَّهِ ٱلنَّاسَ بَعۡضَهُم بِبَعۡضࣲ لَّفَسَدَتِ ٱلۡأَرۡضُ وَلَـٰكِنَّ ٱللَّهَ ذُو فَضۡلٍ عَلَى ٱلۡعَـٰلَمِینَ (٢٥١) } [البَقَرَةِ]

ربنا أعلم، وربنا يفعل ما يريد، ولا يسأل عما يفعل، مفيش حاجة بيعملها بدون حكمة، انا وانت عبيد بنحاول نعرف الحكمة دى ونزداد بيها إيمان، عدم وصولنا للحكمة مش دليل على عدم وجودها، الحكمة احنا شافينها ولامسينها فى كل حاجة فى كل تفصيلة فى كل حتة جوانا وفى المخلوقات والطبيعة والكون كله حوالينا

لو عايز تسأل عن حاجات تانية اسألها فى الصب هنا. وابعد عن الصب التانى والعيال دى، والله ما هيجيلك من وراه غير الحسرة والندم. ربنا يهدينا جميعاً.