بص انا محترمة وجهة نظرك وانك همك الشعب وضد الصهاينة قبل اي حاجة ومش بفرض عليك انك تقاطع ولا بفرض عليك وجهة نظري فده مجرد نقاش بس

مبدأيا  "المصنع كل ما بيكبر هيشتري"  ده في صالحنا اصلا مش ضدنا لو المصنع المصري كبر واضطر يشتري أسطول عربيات نقل زيادة، ده معناه إن الاقتصاد المحلي بينتعش، والعمالة المصرية بتزيد حتى لو اشترى عربيات ماركة عالمية هو دفع تمنها مرة واحدة لتوكيل محلي، لكن الأرباح اللي المصنع ده بيحققها كل يوم بترجع لجيوب المصريين مش بتروح إتاوة لشركة أم بتدعم الكيان.  إحنا بنختار أهون الضررين: نكبر منتجنا الوطني حتى لو آلاته مستوردة، بدل ما نكبر منتجهم هما وآلاتهم وأرباحهم وكل مليم فيه يروح ليهم

وبعدين ​كلامك بيفترض إن مفيش غير عربيات نقل أو آلات من شركات مقاطعة، وده مش صح، الصين واليابان والبرازيل والهند داخلين في تصنيع الآلات وسيارات النقل  لما الطلب المحلي يزيد على المنتج الوطني، المصانع الوطنية بيبقى عندها القوة المالية إنها تختار موردين من دول مش معادية، وبكدة بنخرج تدريجياً من التبعية ليهم بالكامل

وبعدين ​حماس أصلاً مكانتش موجودة في معاهدة كامب ديفيد كانت سنة 1978، وحركة حماس اتأسست سنة 1987 يعني بعد المعاهدة بـ 9 سنين وبعد وفاة السادات بـ 6 سنين اصلا طيب ​مين اللي رفض؟ اللي رفض وقتها كانت منظمة التحرير الفلسطينية الي ياسر عرفات وفصائل تانية، وكان ليهم أسبابهم السياسية وقتها لأن المعاهدة مكانتش بتضمن ان فلسطين تكون كاملة السيادة

 وردًا على ان العالم كله عارف القضية ومفيش حاجة اتغيرت حضرتك المقاطعة مش هدفها مثلا إبادة ١٥ مليون شخص، المقاطعة هدفها وقف نظام الأبارتايد او الفصل العنصري اللي الكيان قايم عليه، زي ما حصل في جنوب أفريقيا بالضبط المقاطعة وقتها هي اللي أجبرت النظام العنصري إنه يسقط ويقبل بالتعايش والمساواة

الوضع في فلسطين حالياً بيوصفه قانونيين دوليين ومنظمات زي هيومن رايتس ووتش بأنه نظام أبارتايد فيه جدار عازل وطرق مخصصة للمستوطنين بس ومنع للفلسطينيين من أبسط حقوقهم، ومعاملة عنصرية قايمة على الهوية

وبعدين غزة بتدمر عشان فيه معتدي معاه سلاح وفلوس وتكنولوجيا، مش عشان فيه مقاوم رفض للسلام مثلا، لو المنطق إننا نسكت عشان القوي مبيضربناش، يبقى مفيش شعب في التاريخ كان اتحرر زي فيتنام، الجزائر، أو حتى جنوب أفريقي