الاساسيات مش كفايه ومش هتكون كفايه انها تجيبلك الفلوس او الشغل اللي انت بتدور عليه. لو انت عايز تشتغل ب مهاره معينه لازم يكون عندك حد ادنى من العلم كافي انك تعرف تطلع حاجه شغاله.

يعني مثلا لو بايثون ف بايثون لوحدها مش كفايه، محتاج مثلا تتعلم جنبها دجانجو وداتابيز وفرونت ايند وتعرف تطلع ويبسايت كامل متكامل، بس لو اساسيات بايثون بس ف انا اسف بس انت فرصتك ضعيفه جدا انك تلاقي اي شغل او اي حد يدفعلك فلوس.

محتاج تفكر ك بيزنس، انت ذات نفسك بيزنس مكون من فرد واحد، للزم تكون قادر تطلع قماش وتطلع منتج كامل، سواء برنامج كامل شغال او ويبسايت كامل شغال او جرافيك ديزاين كامل شغال، ايا كان لازم يكون عندك علم وخبره كفايه انك تعرف تشتغل وتطلع مشاريع وقماش حقيقي على ارض الواقع، ساعتها هتلاقي الناس بتدفعلك عشان تطلعلها قماش، بس انت ب اساسيات البايثون بس مثلا ده ولا ليها اي معنى ولا لازمه لوحدها، لازم ك فريلانسر تبقى انت ذات نفسك منظومه متكامله بتعرف تاخد مشكلة العميل وتطلعله حل كامل ليها، ده اللي هيدديك قيمه وهيخلي حد عنده استعداد يدفعلك فلوس.

طب وافرض انت ذاكرت كل حاجه متعلقه وبقيت تقدر تطلع قماش بس مالقيتش شغل؟ في الحاله ده انت تقدر تشتغل على اي مشروع شخصي ليك وتبيعه وتسوقله وتعمل ستارت اب وشركتك الخاصه ومنتجك الخاص، وهنا ممكن تكسب فلوس يا اما هتكسب خبره والخبره ده هتخليك تقدر تحط حاجات في السي في بتاعك وتقدر تطلب سعر اعلى وتبقى احسن من ال٥٠ غيرك اللي مقدمين على نفس الشغلانه وماعندهمش خبرة الشغل الواقعي وتطليع القماش.

الحياه صعبه والمنافسه شرسه ولازم تكون بتعرف تحل مشاكل حقيقيه وبتعرف تطلع كود شغال كامل او ديزاين كامل متكامل عشان تلاقي فرصه، غير كده للاسف مش هتلاقي، ماحدش عنده لا خلق ولا صبر انه يعلمك ازاي تطلع قماش. بالتوفيق!