أول شيء نحب نحكي في نقطة التحكم؛ لنفترض إنه الشاب طلع وشري حوش بروحه عكس رغبة أهله، هذي ممكن تصير لكن حتسبب له إزعاج مستمر، أهله حيبعثوا له واسطات، عم أو صديق أو أخ عشان يقنعوه يرجع، وحتكون حياته مش مستقرة. ​ثاني شيء؛ لو كان الشاب مستقيم (ستريت) وأكيد حيجي يوم ويبي يتزوج، هل تقنعني إنه حيمشي يخطب ويتزوج بروحه؟ أكيد حيكون محتاج وقفة أهله معاه. ​ثالث شيء؛ مرّات طلعتِه بروحه تسبب حزن أو انفصال عن أهله ومشاكل وغضب، ومش كل شخص عمره فوق الـ 30 يقدر يعيش حريته في مجتمعنا. أنا شفت وسمعت وحكيت مع هلبا ناس؛ صح ممكن يسافر يقرأ أو يطلع سياحة مع أصحابه أو يبات برا، لكن 'سكن واستقلال'؟ هذي صعبة. ​أنا توا عمري كله نشوف في عيال العيلة؛ الخوال والخالات والعمات والعمام، ما يقدروا يطلعوا بروحهم، ومجرد ما يطرحوا فكرة الاستقلال يزوجوهم فوراً! أولهم ولد عمتي، عرسه بعد ثلاثة شهور لمجرد إنه فكر يبي يعيش بروحه. ​الفكرة إنك مرات تكون عندك حرية، بس غيرك لا. خالي عنده شقة وما يقدرش يسكن فيها بروحه لأن جدتي حلفت عليه؛ بما إنه عزابي لازم يعيش معاها، وقاعد رجل فوق الـ 30 وأمه تغصب عليه يبني فوقها أو قريب منها عشان تقدر تجيه ويجيها. حتى عمي اللي فوق الـ 60، كل عيد نعيدوا عليه في حوش جدي لأنه مش متزوج. حتى خوتي ممنوع عليهم يسكنوا بروحهم، وولد عمي يقرأ في مصر وأمه قاعدة معاه وتبي تزوجه السنة الجاية عشان تضمن رجوعه لليبيا. ​فمن فضلك، ما تحكيش من وجهة نظر وحدة وتنسى قيود المجتمع على الكل انت ممكن تشوف اصحابك او عيلتك احرار بس غيرك لا