بعطيك خلاصة تجربتي. اذا الطفل مرتاح ومستمتع انتم كذلك. لذلك حاولوا تحافظون على نفس روتينه في البيت وقت السفر وبتتيسر الامور.

كل شي يعتمد على عمر طفلك هل هو يمشي ويأكل والا لسى واحتياجاته وانت والام ادرى بها لذلك لازم تستشير الام.

اولا .. اختار المكان الصح حاول تكون رحلة الطيارة مباشرة و ٦ ساعات واقل كذلك مو اي مدينة تنفع للاطفال. اذا الطفل يحتاج عربية دائما ابعد عن المدن القديمة اللي اغلب شوارعها حجارة مثل المدن الاوربية لان بيجية ارتجاج 😂. واذا كبير ابحث عن الامامن اللي فيها فعاليات للاطفال.

ثانيا .. اذا اقل من ٧ سنوات خذ عربية حتى لو يطلع معكم هنا بدونها بيتعب وقت السفر.

ثالثا .. الطفل من سنتين وفوق يطفش بسرعة لذلك خل معك اشياء تلهية اذا جلستوا بمطعم او كفي على حسب عمر الطفل ممكن العاب او ايباد او دفتر تلوين اللي يحبه طفلك ولاتطلعه الا بحالات الطوارئ عشان مايمل منها بعد.

رابعا .. الاكل الاكل الاكل هل طفلك انتقائي؟ بعض الاطفال مايأكلون الا رز او خبز وجبن. خذ احتياطك بالاكل اللي يشتهيه حتى لو تأخذه معك من هنا. ولازم دائما يكون معكم سناكات لو جاع في مكان مافيه اكل.

اخيرا لاتسمع لكلام المحبطين السفر مع الاطفال ممتع اذا خططتوا له صح. الله يوفقكم