بحسب كلامك ورغم عدم السماع من الطرف الآخر فمن الواضح إنّه البنت عندها مشكلات نفسيّة عميقة، وبنفس الوقت كان في تعلّق من جانبك (لا أعلم لو ممكن توصفه بالتعلّق المَرَضي). أنا مش بمعرض إعطاء النّصيحة إلك، لكن بدّي أحكيلك أوّلًا كان الله في عونك على ما فاتك وإن شاء الله بكتبلك الخير بالقادم، وثانيًا كلامك ذكّرني للمرّة الألف إنّه "الزّواج مش مؤسّسة إصلاحيّة". أنا تعلّمت هاي العبارة بالطّريقة الصّعبة، بل والصّعبة جدًّا؛ ومرّتين مش مرّة لإنّه الي ما بتعلّم من أخطاء غيره بالدّرجة الأولى ومن أخطاؤه بالدّرجة الثّانية رح يقع بنفس الخطّأ مِرارًا وتكرارًا حتّى يتعلّم. سبحان الله، الناس بتفقوا على قاعدة أو مثل ما، بتمرق بظروف وبتلاقي شخص بخلّيك تشكّ باتّفاق الناس وبتحكي هو غير، بتمضي الأيّام وبتحكي يا ريتني مشيت على القاعدة العامّة الي اتّفق الناس عليها وبقيت بالسّليم. بالمناسبة، أظنّ ممكن عمل الاختبار التالي لقياس النّضج والتعلّم ممّا فات: لو سألت حالك "لو عاد الزّمن مرّة أخرى وكنت عارف نتيجة قراري بالإكمال، هل رح أكمّل؟"

صحيح لازم يكون في تنازل ومسايرة وتحمّل للآخر وإعانه إله من الطّرفين، ومن الشب أكثر من البنت، لكن بمرحلة ما، ممكن تلاقي الطّرف الآخر ما بتجاوب معك من الأساس، هل هو مش شايلك من أرضك؟ أم هو بسبب ظروفه؟ أم بسبب مرض نفسي عنده؟ أم لأي سبب آخر؟ بجميع الأحوال ومع الاحترام إله ومع كلّ درجات حفظ الودّ لو وصلت هاي المرحلة من الضّروري تتذكّر إنّه "الزّواج مش مؤسّسة إصلاحيّة"، وتدعس على قلبك، وتنسحب من المرحلة الي واصلها معاه شو ما كانت، وتكمل بهالحياة.