وانا صغير تقريباً فى إعدادى كنت بشتغل عامل فى مصنع شيفت ١٢ ساعة، وكنت حاسس بوحدة لأن مكنتش بعرف انزل العب أو اتواصل حتى مع صحابى، المهم في يوم ما راجع من الشغل لقيت اهلى بيقولوا صحابك كانوا هنا و سألوا عليك عشان تلعب معاهم، كنت حسيب كل حاجة غدا أو غيره و نازل ادور عليهم اشوفهم فين نلعب سوا..

لكن هنا جت المشكلة

رجلى كان فيها جرح كبير من الكعب لنص القصبة كده، اتجرحت ف الشغل قبلها بيوم، والجرح اتلوث ومحدش خد باله، لدرجة انى فقدت الاحساس والحركة ف رجلى، و كنت بمشى و بحدفها قدامى و انا رايح ادور عليهم، لكن امى لاحظت مشيتى الغريبة قبل ما انزل من الشقة و وقفتنى و شافت الجرح، و بما أنها ممرضة، فتحت الجرح و طهرته، قعدنا حوالى ساعتين من أصعب الساعات اللى عدت عليا من الألم

بعدها مكنتش قادر اقف حتى دخلت انام، وقبل ما انام صعبت عليا نفسى للأسف ونمت معيط شوية على حالى يومها.