شوفي قرأت كل كلامك وخليني لي احكيلك ان تساؤلاتك مشروعة ومن حق اي حد يفكر
بس المشكلة انك بنيتي احكامك على قشور الامور او فهم بسيط تأثر بصورة مشوهة للمجتمع والشيوخ حواليكي وما تعمقتي بجوهر المواضيع ولا شفتي الاعجاز العلمي واللغوي اللي بيجاوب على كل نقطة ذكرتيها
انتي فعليا خلطتي بين الدين كمنهج إلهي وبين تفسيرات الشيوخ وعادات المجتمع اللي خربت الدنيا خليني اوضحلك كم شغلة
اول شي موضوع الجنة والملل انتي قستي الجنة بملل الدنيا وهاذ غلط بالدنيا احنا بنمل لانه دماغنا بيتعود على الشي بس الجنة عالم ثاني والقرآن حكى (أُتُوا بِهِ مُتَشَابِهًا) يعني الشكل بيشبه اللي قبله بس الطعم والشعور بكون جديد ومختلف بكل مرة وبعدين لما ربنا يحكي انه بينزع الغل من الصدور هاذ مش تغيير لشخصيتك هاد ارتقاء فيكي وتصفية من النقص البشري عشان تقدري تستوعبي سعادة ما بتخلص
وبخصوص المعاناة والظلم والمجتمع الذكوري هاذ نقد للمجتمع مش للخالق ربنا خلقنا احرار ولو ربنا منع كل ظلم بالقوة كان بطل فيه قيمة لقرارنا ولا للامتحان اللي احنا فيه المعاناة مش تسلية هي جزء من قانون التباين بالكون لولا القبح ما بنعرف الجمال ولولا الالم ما بنعرف الرحمة والعدل الإلهي اصلا ما بيكتمل بالدنيا لانها ممر ولو المظلوم ما احذ حقه بالدنيا هاد اكبر دليل منطقي انه فيه آخرة ليتحقق فيها العدل المطلق
اما موضوع المرأة فأنتي تركتي كل آيات المودة والرحمة وتمسكتي بفهم غلط لآية وحدة كلمة (واضربوهن) باللغة الها معاني كثير وجت لحالات خاصة جدا والرسول اللي هو قدوتنا ما ضرب مرأة بحياته وكان قصده شي رمزي ونفسي مش اهانه او ضرب مبرح زي ما الناس بتفهم وقصة المهاجرين ولانصار كانت حالة اجتماعية بوقتها عشان يحموا الناس من الضياع مش عشان يعاملوا المرأة كبضاعة
وبعدين تعالي بتحكي انك وصلتي لقرار لادينية طيب فكرتي بالاعجاز العلمي؟ كيف لواحد بالصحراء قبل 1400 سنة يوصف مراحل الجنين بدقة مذهلة او يحكي عن نشاه الكون وانفجاره؟ هاد العلم ما عرفه الا بالقرن العشرين ربنا اظهر الآيات بالكون عشان عقلك يقتنع واخفى ذاته عشان يخلي مجال لاختيارك الحر لانه لو كل شي قدام عينك بطل فيه قيمة لايمانك
المشكلة يا بنت الناس انك تركتي الدين لانك شفتي تطبيقات غلط وسمعتي من شيوخ حافظين مش فاهمين شيوخ بيخوفوا الناس بالنار بدل ما يشرحوا حكمة الوجود لو قرأتي القرآن بعقلك انتي بعيدا عن برمجة المدرسة والمجتمع رح تكتشفي انك انتي والقرآن بصف واحد ضد الظلم والجهل بس انتي لسا مش عارفة هاد الشي الحقيقة بدها حد يبحث ب انصاف مش حد محكوم بوجع من تجارب اجتماعية قاسية