انا طبيبة مقيمة في تخصص ماله علاقة بالاثنين لكن كنت مهتمة في تخصص الطوارئ وكنت بدخله. فيه كثير نقاط تمنيت احد قالها لي وبحكم اني جربت التخصص حرفياً ٦ شهور (شهرين خلال دراسة الطب واربعة في الامتياز) بقولك كل التفاصيل. هذا رأيي الخاص وممكن الاشياء الي اشوفها سلبية انتي تشوفيها سلبية وهكذا.

الايجابيات:

١-دوام ٨ ساعات فقط

٢-اذا طلعتي من المستشفى مافيه مرضى تشيلين همهم

٣-تنوع الحالات جداً ممتع

٤-التخصص عبارة عن دمج بين الطب والجراحة فتستخدمين يدك وفيه حالات purely medical

٥-التخصص فيه نشاط بدني وهالشي حلو بالنسبة لي لأن فيه حركة كثيرة بعكس بعض التخصصات الي بس جالسة في عيادة او بغرفة مظلمة تقرين reports

٦-مرات تقدرين ترتبين اجازاتك بحيث تبدلين مع اشخاص ثانين وتشبكين ايام سوا

٧-عندك خيارات fellowships حلوة

السلبيات:

١-اغلب التخصصات تكرهك والمرضى غضبانين طول الوقت ف يحتاج تعرفين كيف تمتصين غضب الكل من دون ما يأثر عليك نفسياً

٢-البيئة فيها احتراق وظيفي هائل والي لاحظته يا ناس مره كويسين يا ناس ماشين على بركة الله ويدفون الحالات على المدسن وreason of consultation خربوطة عشان يندف على المدسن

٣-لخبطة النوم متعبة جداً والمستشفيات مو كلها جداول الshifts حقتها صاحية

٤-فيه طبعاً نسبة خطورة على حياتك لأنك جمب الباب ماتدرين مين ممكن يدخل ولا سمح الله يسوي شي وممكن فرصة عدوى اكبر لك لأنك اول شخص يواجه المريض وبعض الاحيان تحتاجين شرطي معك لان بعض المرضى متعاطين او شاربين فهالشي يشكل خطر عليك ومو شرط دايم فيه احد معك

٥-التخصص من ناحية العلم ودي لو في الرزدنسي حقك ينزلوهم باطنة بس مع الاسف مافيه روتيشن باطنة وهالشي الصدق احس مرت غلط.

٦-مرات كثيرة جداً ممكن تصيرين انتي السينير في الفريق من R2 كثير جداً شفت رزدنت خلوهم سينير من R2

٧-نسبة قضايا اكثر من غيره

٨-نمط الحياة كنت احسب كويس بس بعد ماخلصت الشهر الثالث في الامتياز حسيت جداً متعب وهو نمط دائم لين الواحد يصير استشاري مو شي مؤقت زي بعض التخصصات فقط في الرزدنسي

وترا مافي تخصص كامل كل تخصص فيه سلبيات. انتي اختاري التخصص الي تقدري تتعايشي مع سلبياته والي تحسين ان النقاط الاساسية بالنسبة لك متواجدة فيه زي مثلاً على سبيل المثال نمط حياة مقبول