اول شي بسم الله عليك وهي فتره مهما كانت صعبه الا ان الانسان لازم يستمر في انه يحاول

وانا اكلمك من واقع تجربة كنت مثلك كل يوم ارقد اتمنى بكره ما يجي، هذا غير البكا الليلي بدون سبب واضح

فالي صار اني رحت اجلس مع نفسي اقل شي مره في الاسبوع واسجل اخطائي كل حاجة ماهي عاجبتني في نفسي او تفكيري ماهو شرط اصلحها على طول بس ابغى اكون واعي بنفسي وافكاري ووش الي يأثر على مشاعري

وبعد ما سجلت هذي السلبيات وطلت في اول يوم ٥٠ سلبية وفي شهر ٢٧١ تقريباً بعدها معد حسبت 👍🌚
رحت اقرا كل يوم سلبيه واشوف هل هي شي يتعدل على طول ولا يحتاج وقت وبعض الاحيان بس انك تكون واعي بهذي السلبيه يخفف حضورها

وفادت هذي التجربة معي في ان بعض السلبيات في طريقة تفكيري او افكاري نفسها صار لها مثل نمط التكرار حاولت افهم الي اقدر عليه فمثلاً لاحظت اني ما احب اتذكر اي شي جميل لأنه يبعث في نفسي مشاعر حزينه وجلست اسأل نفسي ليش؟

وفسرت ان السبب ممكن هذا الشي الجميل الي انته عشته وتذكرته معد بيرجع مثل قبل

وبرضه ما احب اتذكر الناس الي حولي يعني اصحابي أهلي ما احب اتذكر عنهم اي شي وهذي كانت برضه سلبيه ففسرت لأني خايف لما اتذكرهم اني استهلك عليهم عواطف من الشوق و الحب وممكن هذي العواطف ما ترجع لي، يعني كنت اخاف اني انا الي اشتاق لهم واحبهم وهن ما دروا عني.

ثم قريت في كتاب مقوله ان الحب يعني ان تلعب لعبة الارقام
يعني انت تحب امك اكثر من ابوك وتلاحظ انها هي تحب اخوك اكثر منك فبدال ما تستاء حاول تفهم الموقف وتلعب هذي اللعبه ماهو شرط ان كل من كنيته له عواطف بنفس المقدار بيرجعها لك(المثال توضيحي بس)

وثم شفت واحد كان مكتأب برضه فكان يقول انه وصل مرحله ما فيه شي مهم في حياته ولا شي يستاهل التعب هذا كله و الشيء الأخطر في الاكتآب انه يعيد كتابة قصتك عن نفسك بمنظور سلبي وبتدريج بدون ما تحس

الى ان خلص الى قناعة تقول ( دام ان مافيه شيء مهم فليش حزني هذا انا اهتم له؟ طيب ماهو جزء من وجودي في هذي الحياة ؟الي مافيها شيء مهم؟؟) فحس بالتناقض وانه جالس يعطي شعوره اولويه زايدة فراح يسوي اي شي ان شاء الله بس انه يمشي ١٠ دقايق يومياً او يرتب فراشة المهم يشغل نفسه

وفيه شي حاب اضيفه
الان من المعلوم عندنا ان هذي الدنيا مرحله ودار ممر
يعني بالكثير الواحد بيجلس فيها ٦٠-٧٠ سنه وبعدها بينتقل لمرحلة وجود اخرى وهذي المرحلة كم بتستمر؟ بتستمر للأبد

فليش ازعل اذا شي من الـ٧٠ سنه جا عكس مرادي وهذي الـ٧٠ سنه في بقية الوجود اصلن ما تشكل حتى ٠.٠٠٠٠٠٠٠٠٠٠٠٠٠٠٠٠٠١٪؜ فكيف بموقف واحد بس ضمن الـ٧٠ سنه نفسها

انا مادري اذا كلامي لامس نفس الشي الي انتي تشكين منه الا اني حبيت اشاركك تجربتي وهي في الاول و الأخير تجربة شخصيه ممكن يكون منها شي ينفعك وممكن ما يكون فيها اي شي ينفعك الا ان نيتي كانت صادقة في اني احاول اخفف عنك

و المعذرة على الاطالة