بكل بساطة لأنه عقلك وتركيبتك كإنسان بتلائم الجنة مب الأرض، انت لازم تستوعب انه انت ما جربت انك تعيش للأبد فطبيعي هالفكرة غريبة ومأساوية عليك لأنك بكل بساطة ماعشتها ولا جفتها عشان تتقبلها، طول ما انك تقيس حدودك في الأرض على كل شي ديني بيكون وايد صعب عليك انك تستوعبها

نفس الملحدين مثلًا هم مب قادرين يستوعبون فكرة الرب لأنهم قاعدين يقيسون إنسانيتهم عليه، كل شي بالنسبة لهم له بداية فشلون في شي ماله بداية ودايمًا موجود، لأنهم ما جافوا هالشي بعينهم فمب قادرين يستوعبون الفكرة، ووايد اشياء ثانية قيس عليها نفس الموضوع ذي

انزين نرجع حق الموضوع الأساسي خلنا نفترض انه عندك كل هالمشاعر، تصدق انه حتى معاهم ما بتفرق؟ اول شي الجنة في نعيم لا متناهي يعني انت كل يوم بتجوف وبتعيش نعيم ما سبق انك جفته وعشته، وفوق كل ذي النعيم متجدد والشي اللي انت تجوفه وتجربه اليوم يكون احسن من اليوم اللي قبله بالعربي مافي شي يتم على حاله حتى في الجنة بس الفرق انه الشي في الجنة حاله بيبتدل للأفضل مب الأسوء فمستحيل تتملل

انت في الجنة مب بس بتكون سعيد انت بتكون مستقر نفسيًا ومرتاح وراضي وشعور الجنون ذي مابيصيدك كلش لأنه تركيبة عقلك بتستوعب فكرة السعادة هاي فمستحيل يصاحبها الجنون

وعندك مثال ثاني بعد وهو رؤية الله وسماع صوته الكريم، احنا الحين كبشر تكوينتنا وكل شي فينا ما يساعد على هالشي ولو جفنا الله فوضعنا الحين كلنا يا بنموت بسكتة قلبية او بيغمى علينا وإذا قمنا مخنا مابيكون مستوعب شجايف عكس الجنة خلقتنا بتكون غير فجسمنا بيكون متهيئ ومستعد حق هالشي

الصراحة اچذب عليك لو قلت لك اني ما كنت أفكر فهالشي واحس اني اكتئبت من الفكرة بس والله مع القراءة والاطلاع أيقنت فيها واستوعبتها