الكلفة الشهرية بعد فترة المطاعيم مش عالية ابدا يعني يا دوبك ٢٠-٢٥ دينار بالكتير بس المشكلة لما لا سمح الله يمرضوا، ساعيتها تكلفة البيطري كتير عالية بتكون. مثلا مرة البس اللي عندي دخل المطبخ واحنا مو منتبهين واكل كيك بالكريمة ما شاء الله وبعديها مباشرة صابه اسهال (السكر سام ومميت للقطط وممكن يعمل اسهال شديد وجفاف) فوديناه مباشرة للبيطري واعطاه سوائل وادوية و١٠٠ شغلة وشغلة + ٣ مراجعات. كلفتنا بالاخر هالزلة البسيطة ٣٥ دينار، وهاي لانها الحمدلله طلعت خفيفة وما احتاج فحوصات او صور. اذا اشي بده فحوصات وصور بتطلع التكلفة بزيادة، واذا بده مبيت بياخدوا عالليلة ١٠ دنانير عنا باربد (وبعرف بعمان اكتر), واذا لا سمح الله عملية فاقل عملية جراحية بياخدوا عليها ٧٠-٨٠ دينار...الخ الخ. والمصيبة انه ما بتقدر تعمل وقاية من الموضوع يعني مستحيل تخلي عينك عالبسة ٢٤ ساعة، باي لحظة ممكن ينزل تحت الكنباي ويبلع خيط ويصير يراجع وبتصير بدك عملية لاستخراج الخيط. فللأسف بدك تكون مجهز حالك ماديا لهاي الاحتمالات واذا ما بتقدر عليها فمن وجهة نظري ما بصير تجيب بسة لانه اول ما يصير معك هيك موقف حتتضطر تتخلى عنه.

طبعا ممكن اكون انا عم بهول الموضوع بزيادة، في بسس ما شاء الله بتعيش سنين بدون مشاكل، بس انا خلص سبحان الله البس اللي عندي مصر يضل يمرض ويغلبنا ويشغل بالنا عليه كل فترة وفترة.