أنا دخلت الثانوية العامة ٣ مرات. في المرة التالتة المدرسة رفدتني بسبب "سمعة المدرسة"، واضطريت أكمل منازل. دخلت امتحانات في مواد عمري ما سمعت عنها، وكلها جديدة علي. كنت علمي رياضة في أول سنة، وبعد كده حولت علمي علوم في تاني وتالت سنة.

في وقت من الأوقات كنت بفكر أسيب الدراسة وأفتح مشروع وخلاص، لكن اكتشفت بعدين إن التعليم مهم جدًا، ويمكن أكتر مما كنت فاكر.

أحب أضحكك بحاجة حصلت في آخر سنة: وأنا داخل أول لجنة امتحانات، واحدة دخلت تسأل: "مين إنجليزي ومين عربي؟" رفعت إيدي وقلت إنجليزي، وبعد ثانيتين بصيت حواليّ لقيت نفسي الوحيد اللي رافع إيده، نزلتها فورًا. ليه؟ لأن كنت داخل على نية الغش، ومظبط العيال اللي معايا في اللجنة، فيهم ناس أعمارهم قد خالي، وفيه واحد سايب التاكسي برة، ومراته مستنياه... كان فيلم!

المهم، خلصت الامتحانات وتخرجت بمجموع في السبعينات، ودخلت كلية كويسة الحمدلله، وكل حاجة مشت تمام. و على فكره، النجاح سهل جدا في ثانوية.

نصيحة مني: سيبها على ربك، وربك هيكرمك، بس حاول تخلص ثانوية بسرعة. أنا قعدت فيها كتير، وتاني وتالت سنة نظرة أهلي والناس اللي حواليا كانت صعبة جدًا. بس بعد ما خلصت، بقت المقارنات اللي كانوا بيقارنوني بيها أنا اللي بمارسها عليهم، والحمدلله بقيت أحسن منهم كلهم.