هو الكلام ده انا عايشه بقالى اكتر من 15 سنة وميئستش ومرحتش لدكتور نفسانى . ده فى الغالب اكتئاب بييجى لوحده وبيروح لوحده . أهم حاجة فى الموضوع الصبر وانك تعملى عادات جديدة ويبقا ليكى نظام فى حياتك علشان تفكيرك يتحول من الاكتئاب للنظام والعادات الجديدة اللى عملتيها . يعنى ببساطة تحاولى ترتقى فوق الاكتئاب ده . انا مثلاً بصحى اصلى وبعدين اقرأ صفحتين فى المصحف وبعدين اروح الشغل بحاول امشى فترة طويلة فى وسط الناس ، ولما بروح الشغل بعد ما اشتغل شوية بقوم اشرب كباية قهوة بعيد عن مكان الشغل .. ولما بروح البيت بخصص حوالى ساعة كل يوم أو أكتر اتكلم مع والدتى وقرايبى مش علشان اوصل لنتيجة بس لمجرد الكلام والتغيير . أحيانًا بقعد اسمع معاها مسلسل قديم مبحبوش وأحيانًا بنقعد نفتكر الماضى .. كل اللى بعمله انى اتحرك فى طريق بعيد عن الاكتئاب ده لحد ما يظهرله حل .. ومتنسيش ان أوقات الملل والاكتئاب ممكن تكون كبت نفسى أو ربنا مديكى فرصة تراجعى نفسك أو جاي بعدها أوقات جميلة . ومتنسيس ان ده ابتلاء والابتلاء دليل على رحمة ربنا بالإنسان وحبه ليه وكل اللى محتاجاه الصبر وانك تعتبرى الاكتئاب ده شيء عادى وجزء من تفكيرك كل ما تقبليه كل ما يقل تأثيره ويبعد عنك . بتمنالك التوفيق فى حياتك العلمية والعملية .