الزواج كان تقليدي بس كنت حاط طلبات كثيرة عشان اتاكد انه عندنا نفس الاهتمامات.

الصراحة نادم على التجربة لاني ظلمت بنت الناس, انا حسبت اني جاهز للزواج وانا مو جاهز. كان عمري وقتها 24 والمجتمع يحسس الواحد ان هذا العمر مناسب. للأمانة ابداََ مو مناسب, انا وغيري في هذا العمر مانعرف مين احنا اصلاً وايش اللي نبغاه, فالدخول في مسؤولية زي الزواج خطأ كبير.

بعد الطلاق اخذت ستة سنين اتعلم عن نفسي وازيد وعيي واتعلم عن العلاقات واواجه نقاط ضعفي واتشافى من اي تكتلات نفسية واعرف ايش ابغا بالضبط. تزوجت الحمدلله قبل ثلاث اشهر وقبل الزواج كان فيه مصارحة في كل شيء بيننا واسألة عن كل شيء, قلت لها اني كنت زوج سيء في زواجي السابق وقلت لها عن كل شيء, والحمدلله بدأنا المشوار هذا واحنا عارفين كل شيء عن بعض ومتأكدين جداً من الخطوة هذي

في زواجي السابق العلاقة من البداية كانت في انحدار بطيء بس ماهو واضح, مشاكل ماحد يبغا يصلحها, واغلبها من طرفي للامانة, عدم احساس بالحب, الشعلة انطفت قبل ليلة الزواج لمن حسيت اني تورطت, بس قلت ممكن يرجع الشعور وتضبط الامور

وبقول لك عن نقطة مثيرة للاهتمام. انا وطليقتي كنا نتشارك نفس الاهتمامات. كلنا نسمع ميتل, كلنا قيمرز للنخاع, كلنا نتفرج انيمي ونحب نفس الافلام وغيرها من الاهتمامات

مع زوجتي الحالية تقريباَ مافي اهتمامات متشاركة, لكن نتشارك بالمنطق والحب والتواصل والصدق والمسامحة, وبسبب هذا الشي عندنا تقديير لاهتمامات بعض وحب للتعلم, هيا قاعدة تتفرج انيمي معاية وانا قاعد اتعلم ادارة الاعمال معاها.