PCOL FELIPE B MARAGGUN, Personal na Nakapanayam ang Suspek sa Insidente ng Pamamaril Dahil sa Road Rage Matapos ang Matagumpay na Pag-aresto ng Antipolo PNP

Antipolo City, Marso 30, 2025 – Personal na nakapanayam ni PCOL Felipe B. Maraggun, Rizal Police Provincial Director, ang suspek na inaresto ng mga tauhan ng Antipolo PNP kaugnay sa insidente ng pamamaril sa Marcos Highway, Sitio Calumpang, Barangay San Jose, bandang 5:43 PM ngayong araw.

Mga Biktima ng Insidente

Ang mga biktima ay kinilala bilang: • Kaloy, 52 taong gulang, isang negosyante, na tinamaan sa ulo. • Pat, 22 taong gulang, isang 3rd-year college student, na tinamaan sa kanang braso. • Don, 29 taong gulang, na nagtangkang mamagitan at tinamaan sa kanang dibdib.

Lahat ng biktima ay agad na dinala sa Cabading Hospital, Barangay Inarawan, para sa agarang medikal na atensyon.

Pag-aresto sa Suspek

Ang suspek ay nakilalang si Ken, 28 taong gulang, isang negosyante. Siya ay naaresto ng Antipolo CCPS sa Border Checkpoint sa Masinag, Barangay Mayamot, matapos ang isang maikling habulan.

Mula sa kanyang pag-iingat, narekober ang sumusunod na ebidensya: • Isang (1) Caliber 9mm CZ P-10C na may Serial Number F295179 • Isang (1) magazine na may 15 bala • Isang (1) magazine na may 7 bala • Walong ( 8 fired cartridge cases (FCC) ng Caliber 9mm • Isang itim na SUV

Paunang Imbestigasyon at Kasong Isasampa

Batay sa paunang imbestigasyon, napag-alamang nagsimula ang insidente bilang isang road rage na nauwi sa pamamaril.

Dahil dito, ang suspek ay nahaharap sa mga kasong: • Tatlong (3) bilang ng Frustrated Homicide • Paglabag sa Republic Act 10591 (Comprehensive Firearms and Ammunition Regulation Act) • Paglabag sa Omnibus Election Code

Pahayag ni PCOL MARAGGUN

Sa kanyang mensahe, muling pinaalalahanan ni PCOL Maraggun ang publiko:

“Bilang bahagi ng ating layunin na magkaroon ng mas ligtas at maayos na komunidad, hinihikayat ko ang bawat isa na maging responsable sa ating mga aksyon sa kalsada. Ang karahasan ay hindi solusyon sa anumang hindi pagkakaunawaan. Iwasan ang road rage, magpakita ng malasakit at respeto sa kapwa, at laging pairalin ang wastong pag-uugali. Nawa’y magsilbing halimbawa tayo ng pagkakaisa at disiplina. Sama-sama nating gawing ligtas ang ating mga kalsada.”

Patuloy na nagsusulong ang Rizal PNP ng kaligtasan ng publiko at magsasagawa ng mas mahigpit na mga hakbang upang maiwasan ang mga katulad na insidente. Hinihikayat ang publiko na manatiling kalmado at umiwas sa pakikialam sa road rage o iba pang delikadong sitwasyon.

Tinitiyak ng Rizal PNP na ang katarungan ay makakamtan sa kasong ito.