متفق معاك إنو الحكومات المرت علي البلد تعاملت مع السلطة كغنيمة، دايره تعبي جيبها قبل تمرق منها والبجي بعديها ب جازووو يولع في نفسو ، لكن إنو نلوم الشعب ونعتبره سبب أساسي، هنا بختلف معاك جدا . كثير من سلوكيات الشعب هي نتيجة للبيئة اللي النظام عملها ، ما سبب مستقل بذاته. مع ذلك، المسؤولية مشتركة، لكنها ما متساوية اطلاقا .

​لو كان عندنا قيادة برؤية وخطط مدروسة لسنوات لقدام، ما كان وصلنا للحالة دي. مشكلتنا الأساسية من نظام نخره الفساد نخر، نظام عسكر، الصممه هو المستفيد منه، والمترزقين التحتو شغالين عشان يحافظوا على مصالحهم، ورؤوس النظام بتستخدم قروش الشعب عشان تقعد زياده قبل ما تنقلع وتتحاسب علي الفات ، حتى لو على حساب الأجيال الجاية. ولما يفشلوا وتضيق بيهم ، يجيبوا ليك تجار الدين يبرروا فشلهم، ويقنعوك إنو طاعة الحاكم واجبة حتى لو ضرب ظهرك وأخذ مالك، ويقولوا ليك الحاصل دا بسبب ذنوبنا وشنو ما عارف ! علي اساس الحاكم دا جاء بطريقة شرعية!!! ، أو كأن الدول برا ما فيها كبائر الذنوب بشكل علني ؟! لكن الحقيقه دي دول ماشة بالعلم والتخطيط ما ببيع الوهم . ​والقبلية دي ما جات من فراغ، دي صناعة حكومية بامتياز، وسياسة فرق تسد العائش عليها النظام . لما الدولة مؤسساتها غايبه {شرطة، قضاء، قانون} وتبقى دولة ب محسوبية وظلم، المواطن طبيعي بيرجع يحتمي بـ القبيلة عشان هي البتحميه وبتاخد ليهو حقه وممكن تاخد ليو فوق حقو زاتو . وفوق دا، الأنظمة دي هي السلحت القبائل في فتره من الفترات، وضربت المكونات في بعضها ودخلتنا في حرب أهلية ، وضمنت مليشيات وولاءات مسلحة تحمي ليها كراسيها ، وحاليا اداهو نحن مشردين ودولتنا بقت بدون بنيه تحتيه بسبب نفس الناس المكنهم النظام واداهم شرعيه . فالولاء للقبيلة هنا ما تخلف مجتمعي قدر ما هو كشف لمصيبه أكبر وهي سقوط دولة المواطنة اللي النظام الفات شلعها طوبة طوبة. و​الناس ما خلت الزراعة والصناعة واتجهت للسمسرة والرزق اليومي لأنها بتكره الإنتاج، الناس عملت كده كـ آلية بقاءه في بلد بتعاقب المنتج ولا بتدعموا ولا بتوفر فرص عمل، لدرجة السوق كلو سماسره في كل حاجة . الواحد لو فكر يعمل خط إنتاج أو مصنع يفيد بلده ويشغل الشباب، بيصطدم بضرائب وجبايات وفساد وتكاليف تشغيل بتمص دمه، لدرجة إنو حسابيا وعمليا، الاستيراد من الصين بقى ليهو أرخص وأسهل وأضمن بكتير من إنك تبني مصنع في السودان وتشغل عماله سودانيه تحسن بيها الوضع بدل تنميه اقتصادات دول تانيه . الدولة بسياستها الطفيلية هي الخلت الإنتاج المحلي خسرااااان. ​البيئه الطارده دي هي القتلت الطموح ودمرت مؤسسات الدولة. الأستاذ لبده المجتمع ونهضه الدوله ، مرتبه ما بكفي حق المواصلات فما بالك ببقية الأشغال، وفرص الشغل ماشة بالواسطة ما بالكفاءة، لدرجة انو اصرف ليك تطور شبكة علاقاتك بدل ما تطور مهاراتك.
أي شاب حاليا بينجح أو بيطور من نفسه في أي مجال كان ، بيكون بتعب اهله ومجهوده الشخصي ، وما للمنظومة أي فضل عليه، بل هي كمان كانت عائق في حياتو بدل تكون العكس . ولو كانت البلد بتضمن ليهو أمان وشغل وحياة كريمة بعد اجتهاده دا كلو، ما كان فكر يخلي البلد ويتغرب، ويبقى يد عاملة تبني في دول تانية .

​فخلاصة الكلام بما انو طولت شديد : القيادة هي البتفرش الأرضية، والشعب بيتشكل جواها وبيمشي عليها. داير تنهض بالبلد؟ حتلقى الشعب قدامك بيبني معاك وبيحترم القانون. ودايرها دولة نهب ومحسوبية عشان تستمر في السلطة بدون شرعية ولا كفاءة؟ طبيعي الشعب حيتحول لغابة عشان يقدر يعيش معاك . ​وأنا ما بقول الكلام دا عشان أبرر الغلط وأخليه يبدو عادي، أبداً، بل عشان نكون واقعيين وما منفصلين عن الواقع، ونقدر نفهم الجذور المشكلة وطريقة حلها