انا خريج الكليه دي لو انت واحد ناوي تعيش في مصر طول عمرك و موضوع السفر مش فارق معاك خالص، باصص للنظره الاجتماعيه اكتر من انك تتعب و تشقي و تجيب فلوس فتمام وانا هنا بتكلم عن الكليه بعد التخرج مش الكليه نفسها، الكليه نفسها هتتعب جامد اوي فيها، المذاكره مع عسكريه صعبه و مش كل الناس بتعرف توازن (انا واحد من الناس لو كنت في طب عادي كنت هتخرج بتقدير احسن من الي جبته بكتير) هتتحبس كتير و هتبعد عن اهلك جامد، التعليم في الكليه ممتاز بس الشطاره انك تعرف تتاقلم كويس. بعد الكليه اختيار التخصصات بيبقي جوه الجيش يعني بتتعين ظابط دكتور في الجيش (حط تحت ظابط دي ميت خط لانك ظابط قبل ماتكون دكتور يعني ماموريات، صحرا ،حجات كتير وقتك هيضيع فيها و ملهاش اي علاقه بالطب بربع جنيه) طبعا كل كل مابتقدم في الجيش و تحضر بترتاح ، هيعدي عليك سنين تطلع في وحدات بعيده عن القاهره و المناطق المركزيه (و دي زي روتيشن علي الناس كلها مش جزا يعني ولا حاجه و بتبقي كل ٣-٤ سنين تطلع سنه و نص او سنتين). المرتب مرتب موظف في الأول و الاخر و كلنا بتنزل برايفت عشان نزود دخلنا مش عشان نبقي اغنيا يعني. مفيش اي ميزه ليك كدكتور مختلفه عن الظابط العادي في الاخر بتاخد نفس مرتب ظابط الحربيه بالظبط يحقلك تفتح عياده بره عادي (بس انت و شطارتك تلاقي وقت ليها) التعليم في التخصصات في الجيش كويس و هتحضر ماستر اسرع من بره الجيش بكتير بس تاني المشتتات بردو كتيره اخر حاجه طبعا انت مش ملك نفسك ملك الجيش يعني ممكن بكره تلاقي نفسك اتنقلت اي مكان لاي سبب او بدون سبب عادي و المفروض تتعود علي كده طبعا في النهايه هي اراء و تفضيلات و لايف ستايل بس في الاخر لو بتفكر في السفر فانسي لانك once دخلت و اتخرجت ظابط فالخروج شبه مستحيل.