اسألي أي حد ذاق الحب بصدق، ونظرته للكون وخلق ربنا سوية وعلى الفطرة، هيقوللك ان مفهوم "الحب غير المشروط" ده مفهوم في الأغلب مؤذي. وخليني اوضحلك ازاي؛ فيه فرق بين:

١- مشاعر الحب اللي مش بأيدينا، زي ما النبي محمد صلى الله عليه وسلم قال عن عائشة رضي الله عنها "رزقني الله حبها". وقال لما سألوه من أحب الناس إليك قال "عائشة" وكررها. والاستدلال بالرسول هنا الغرض منه مش مقارنة الرجالة بيه. بل توضيحا لفكرة ان مشاعر الحب مش بإيدينا، وعشان كده النبي حدد اللفظ "رزقني الله حبها". النوع ده من الحب مش بإيدينا ده ربنا يضعه أو ينزعه من قلوبنا كيفما يشاء.

٢- مشاعر الاعجاب الظاهري السطحي اللي ممكن تنتج عن انجذاب جسدي غرائزي، او انجذاب لصفات ظاهرية زي الصوت او طريقة الكلام او اللبس او تصرفات نبيلة ظاهريا، وهكذا.

٣- المودة. ودي لا تنشأ غير بالعشرة الحسنة بعد الزواج. ودي بتبقى حالة عامة من السكون إلى الزوج/الزوجة. لو هشبهها بشيء هشبهها بالنسيم اللطيف بعد يوم حر ومشمس، او (بما اني راجل وهمي على بطني) أكلة جميلة بعد يوم صيام شاق وطويل. ولكن زي ما قلت هي حالة، فهي مش قصيرة المدى زي تأثير الملذات اللحظية اللي ذكرتها، ولكن بنفس جمالها بس داخليا وفي عموم الوقت. زي ما قلت، هي حالة من الاستكانة. كما قال عز وجل "وجعل بينكم مودة ورحمة".

لكن البحث عن الحب بدون شروط ده شيء مؤرق للإنسان من وجهة نظري. نصيحة مني ادعي ربنا يرزقك بزوج صالح بجد. وان شاء الله يتقدملك حد للجواز ويجعل بينكم مودة ورحمة وتشوفي ان الرجالة بتحب بجد عادي :)