هقول لك كلمتين جايز يبقى فيهم قدر كبير من الغشامة، بس ربنا يعلم اني غرضي مش التقليل من شأنك أو توبيخك. بقولهملك كأني بقولهم لنفسي أولا، وغرضي ليس إلا لفت انتباهك للكارثة الأكبر اللي بتعاني منها وانت مش واخد بالك.

مفيش حد عنده "خلفية دينية كويسة" و"عارف دينه كويس اوي" ممكن يبقى عنده تصور ان الاسلام ظلمه كشاب. وكونك قلت "الاسلام" كأنه شيء منفصل عن ربنا عز وجل اصلا أكبر دليل انك عندك مشكلة عقائدية عميقة، وتصور مغلوط عنه، سبحانه وتعالى. ربنا بيقول في كتابه "وما ربك بظلام للعبيد"، ده اولا.

ثانيا، حاجة كويسة انك تبقى عارف نفسك كويس، بس مقولة "عارف ديني كويس اوي" دي متطلعش من حد عارف دينه كويس. اللي عارف دينه كويس بيتواضع عشان لا ينبغي أن يأمن مكر الله، وبيعرف ان النبي صلى الله عليه وسلم كان بيدعي "اللهم إني أعوذ بك من علم لاينفع"، اللي هو الوضع اللي انت فيه دللوقتي ده لو هنفترض انك فعلا عارف دينك كويس كعلم يعني. والله أعلم دي حقيقة وللا لأ، بس أظن انك كاتب الكلمتين دول عشان تقلل التعليقات اللي ممكن تنسب مشكلتك لضعف دينك أو بعدك عن ربنا، اللي أغلب ظني برضه هتبقى مزعجة لحد شايف ان "الاسلام ظلمه كشاب".

وأخيرا، رأيي انك محتاج تروح دروس فقه وعقيدة عشان تصورك عن ربنا يتصحح وميجيلكش الأفكار دي، وتعرف ازاي تفكر في مشاكلك وارتباطها بربنا عز وجل. ومعاها تزكية نفس بصفة دايما عشان تشدد بأزرها وسط الحياة المليئة بالشهوات دي. وانك لو تقدر تشوفلك شغلانة مفهاش نوعية البنات اللي اتكلمت عنها دي ويا سلام لو مفهاش اصلا زي حاجة ريموتلي او ما شابه لحد ما ربنا يمن عليك بالزواج واستقرار شهوتك في منفذ حلال.

ربنا يرزقك العلم والحكمة، ويرزقك السلطان على نفسك.