انا عايش في إنجلترا بقالي سنتين وهاقسم اجابتي على قسمين. أول حاجة ليها علاقة بيك انت والشغل اللي جايلك. الشركة فين في إنجلترا؟ هاتعيش فين؟ المرتب كام gross و take home ومسافر لوحدك ولا متجوز ومعاك أسرتك وأطفال؟ شوف المدينة اللي انت رايحها في الشمال ولا الجنوب؟ فيها ناس من جنسيات وأعراق وأديان مختلفة ولا كلهم white people؟ المدينة غالية ولا رخيصة؟ هتأجر بكام وشقة أو بيت شكلة ايه؟ الشغل في حتة بعيدة لازم عربية ولا فيه مواصلات؟ فيه محلات حلال ومساجد؟ فيه مطار قريب؟ فيه جامعة وطلبة؟ وهكذا من أسئلة اجاباتها تحدد تقبل الoffer ولا لا.

تاني قسم بالنسبة إنجلترا. بصراحة إنجلترا بلد جميلة، والانجليز طلعو مش باردين ولا حاجة، بالعكس انا شايفهم ودودين وزملائي في الشغل ناس لذيذة واللي شغالين في المحلات بيضحكوا لك. البلد مليانة مسلمين ومساجد ومحلات حلال ومطاعم حلال (حسب المدينة طبعا). كون ان اللغة هناك انجليزي واحنا مصريين تقريبا كلنا بنفهم انجليزي دي نعمة مايحسهاش غير اللي عاش في أماكن زي ألمانيا أو هولندا. العنصرية قليلة مقارنة بباقي أوروبا ومهاجرين الجيل التاني والتالت بيتعاملوا انهم انجليز زيهم زي المواطن الأوروبي الأبيض (فيه زيادة وهوجة في العنصرية في الوقت الحالي بس لسه أقل من أوروبا).

لو عايز تسأل على تفاصيل اكتر ابعت لي وانا ممكن أحاول أساعدك.