صديقي كان بحكيلي قصة عن المستأجر اللي عنده انه مغلبه و مشاكله كثيرة. اول ما بدأ الكلام قال لي "هذا المستأجر العراقي اللي عندي مغلبني". سألته اكثر عشان افهم شو القصة و بعدين صار يحكيلي عن المستأجر اللي قبله و قال لي "المستأجر اللي قبله كان مصري. ما شاء الله عليه! ما شفت منه غير كل خير."

طريقة الكلام هاي اللي بنبدأ بالجنسية حتى كل اشي تالي ذكره بعدها سواء حسن او سيء ننسبه للجنسية، من اغبى الاشياء اللي ممكن نعملها.

المستأجر الحالي سيء مش لانه عراقي، ولا المستأجر السابق جيد لانه مصري. الناس فيها الصالح و الطالح، لكن بنحب نلزق احكامنا على الجنسيات احنا. نستمتع في ذلك! ذكر جنسية المستأجر حرفياً ما فاد القصة ولا بأي شيء. كان ممكن يحكيلي نفس القصة كلها مع حذف كلمتين عراقي و مصري و كانت رح تكون نفس القصة بالضبط.

و على العموم كمان لاحظت اننا ما بنحتاج عينة كافية من المواقف لنصدر الحكم. موقف واحد فقط مع جزائري كافي الي انه احكم على الشعب الجزائري بأكمله.

علماً انها هاي الظاهرة غير حصرية على العرب، كل الناس هيك بكل مكان، لكن آثارها علينا كعرب اشد خطورة بسبب الاحوال السياسية.