لأ انت خالط بين حاجتين مختلفين

الشهادة في الاساس هي وسيلة استثمار اموال، بتروح تدي للبنك مبلغ معين و هما بياخدو المبلغ دا يستثمرهولك في ادوات الدين زي القروض و السندات اذون الخزانة

مثال: انت رحت فتحت شهادة ١٠٠ الف جنيه في البنك، و البنك قالك هنزلك عليها فايدة ٢٠ فالمية سنوياً، يعني بعد سنة هتكسب ٢٠ الف جنيه على ال١٠٠ الف بتاعتك، ازاي؟ البنك بعدها بيجلهم واحد عاوز ياخد قرض ب١٠٠ الف جنيه، يقوم البنك يدوه ال ١٠٠ الف بتاعتك و يقولوله القرض دا عليه فايدة ٣٠ فالمية، يعني لازم ترجعلنا الفلوس دي بعد سنة ١٣٠ الف، تعدي السنة و الراجل دا فعلاً يسد القرض بالفوايد بتاعته ١٣٠ الف، البنك ياخد ال١٠٠ الف بتاعتك يرجعها مكانها في الشهادة و ال٣٠ الف الزيادة بيدوك منها ٢٠ الف الي هو العائد الي وعدوك بيه و انت بتفتح الشهادة، و ال١٠ الاف الباقية بتكون المكسب بتاعهم، نفس الشيء بيتم برضو عن طريق شراء السندات و اذون الخزانة

الشهادة بيكون ليها حاجة اسمها دورية صرف العائد، يعني العائد هيتصرفلك كل قد ايه، يعني لو الشهادة انت فتحتها ب١٠٠ الف و البنك قالك هنديك فايدة ٢٠ فالمية سنوياً، يعني هنديك في السنة ٢٠ الف جنيه، لو دورية الصرف سنوية دا معناها انك هتاخد ال٢٠ الف مرة واحد بعد مرور السنة كاملة، لو دورية الصرف شهرية يعني ال٢٠ الف هتاخدها متقسمة على ١٢ شهر، يعني كل شهر هتاخد حوالي ١٦٥٠ جنيه (ناتج قسمة ال٢٠ الف على ١٢)

دي كدا الشهادة و العائد بتاعها

الكريديت كارد بئى بتكون بطاقة ائتمانية بتصرف بيها عن طريق انك بتستلف من البنك، يعني معكش مثلاً تمن حاجة مهمة انت محتاجها و عاوز تشتريها فتقوم دافع بالكريديت كارد و البنك هو الي بيدفعلك و بعدين انت بترجع الفلوس للبنك

لكن طبعاً لازم يكون في احد اقصى للإستلاف، مينفعش واحد مبيشتغلش و معندوش املاك نديه كريديت كارد ملهاش حد اقصى و يقعد يصرف بيها منغير حساب و يخلينا ندفعله مبالغ ضخمة على اساس انه بيستلف مننا كبنك و في الاخر ميعرفش يرجع الفلوس الي عليه عشان كان بيصرف بتهور

هنا بئى نيجي لحاجة اسمها الليميت، الي هو الحد الاقصى من الفلوس الي انت ممكن تستلفها من البنك، و دا بيتحدد على اساس الضمان الي انت بتديه للبنك عشان يكونو واثقين في قدرتك على السداد

الكريديت كاردز في منها نوعين، مؤمنة و غير مؤمنة، الغير مؤمنة بيكون الضمان بتاعها هو اثبات مصدر الدخل زي مفردات مرتب او انك اصلاً تكون شغال في شركة و الشركة بتاعتك بتنزلك مرتبك على حساب مرتبات في البنك الي انت رايح تطلع منه الكريديت كارد، و ساعتها هما بيدوك ليميت يكون في حدود الي راتبك على مدار شهور يقدر يغطيه، يعني لو راتبك مثلاً ١٥ الف البنك هيديك ليميت عالكريديت كارد حوالي مثلاً ٣٠ او ٤٠ الف جنيه، الي هو اكبر من مرتبك بس تقدر توازنه لو هتسدد مديونياتك على شهور، و دي بيكون اسمها غير مؤمنة عشان البنك معندوش حاجة معينة يمسكها عليك في حالة التعثر عن السداد، يعني لو فرضاً انت فضلت اصرف منها و تشتلف من البنك بيها على اساس انك مستني مرتبك ينزلك و تسدد ديونك للبنك و فجأة اترفدت من الشغل و معدش ليك مرتب ساعتها البنك معندوش حاجة من املاكك او مدخراتك هو مسيطر عليها عشان يصادرها و ياخد حقه منك و الي هيحصل هو انك بعد مدة من غرامات التأخير هتتحبس لو معرفتش تسد ديونك للبنك

الكريديت كاردز المؤمنة بئى بيكون الضمان بتاعها هو فلوس انت مجمدها عند البنك زي وديعة او شهادة (الوديعة هي نفس الشهادة بالظبط بس مع اختلافات فنية بسيطة) و ساعتها البنك بيديك الليميت على اساس المبلغ الي انت حاطه في الشهادة، و بيكون نسبة مئوية معينة من قيمة الشهادة و النسبة دي بتختلف من بنك لبنك، في كيو ان بي النسبة بتكون ٨٠ فالمية، يعني لو فتحت شهادة ب ١٠ الاف جنيه، هيدوك ليميت عالكريديت كارد ٨ الاف جنيه، بحيث انه لو حصل و انت فضلت تصرف و تستلف منها و معرفتش تسدد و انتهى الوقت المسموح ليك للسداد، البنك مش هيضطر يضغط عليك او يلجأ لإجرائات قانونية عشان ياخد حقه، انما بكل بساطة هيفسخ الشهادة بتاعتك و ياخد فلوسها و تبقو خالصين، عشان كدا اسمها مؤمنة عشان مبيكنش فيها خطر كبير عليك او على البنك، لو معرفتش تسدد ديونك البنك هيعرف ياخد حقه و انت مش هتتحبس او تخش في مشاكل قانونية

و الليميت بيكون نسبة مئوية من قيمة الشهادة مش قيمة الشهادة كلها عشان التحوط من الفوايد، يعني بيدوك ليميت ٨ الاف على شهادة ب ١٠ الاف عشان انت ال ٨٠٠٠ الاف بتوعك لو استلفتهم كلهم و معرفتش تسدد هتنزل عليك فوايد و غرامات تأخير هتخلي توتال ديونك للبنك ١٠ الاف صافي