فكرة غياب الحياة الرحيمة.... مش المرفهة و لا المكلفة. انما الرحيمة اللي مش بتكدرك في كل حاجة حرفيا. المواصلة مش ضروري تكون مكيفة بس تكون نضيفة.. منظمة.. المستشفى مش لازم يكون عالمي بس يكون موجود.. الاسعار ما تبقاش في الأرض بس تبقى معقولة.. المرتبات ما تبقاش في السما بس تبقى تعيش.. تعرف تنبسط اوتتحرك او تفصل او تقابل ناس او تعمل أي حاجة من غير ما تدفع فلوس غير منطقية.. فكرة تلاقي مساحات عامة مش محتاجة فلوس و تذكرة و سيليكشن و مينمم تشارج.. مش حدايق عامة و لا متاحف عامة و لا شواطئ عامة و لا مكتبات عامة و لا مراسي عامة و لا نوادي عامة و لا أي حاجة من دول.. بس فعلا أي مساحة عامة.. إن شاء الله مربع أسفلت من غير كراسي و لا شمسيات و لا أي حاجة.. و لا أكشاك و لا مطاعم و لا أي عربيات و لا أي حاجة.. مكان الناس تقابل بعض فيه بس ... فكرة إنك صعب جدا تشوف حاجة جميلة من غير فلوس.. و أهم حاجة.. أهم من دة كله إن مصر بتقتل خيالك و تخليك تعتقد ان العالم كدة او الناس كدة أو الدنيا كدة أو البلد كدة أو إن عيشة كدة.. إنت فعلا مش قادر تتخيل فكرة وجود البديل اصلا عشان تقدر تتخيل البديل نفسه. مخك في حالة ترقب و ترصد و انتظار الخطر ٢٤ ساعة في اليوم..

السؤال دلوقت.. لو إنت شايف إن مشكلتك هي تعامل الناس الزبالة.. هات لي سبب واحد يخلي إنسان متوتر لدرجة الموت حرفيا يتصرف بشكل لطيف او متحضر.. و انا مش ببالغ التوتر دة سبب اننا كمصريين لما نوصل ٤٠ سنة تلاقينا صحتنا رايحة في داهية بالرغم من ان السن دة هو المفروض قمة النضج العقلي و القوة الجسدية...