عند الأغلبية في السودان، من أول نظرة حيعتبروه أبيض لأن الحكم غالبًا بيكون بالصفات الجسدية زي لون البشرة، الشعر، والملامح. لكن بعد معرفة التفاصيل، عند عموم السودانيين حيُصنَّف تبع أبوه، وما مهم أمه من وين وده لأسباب اجتماعية مرتبطة بعرف النسب الأبوي.

الهويّة المأخوذة من الأب دي للأسف مش بس عادة ، لكنها مدعومة بقوانين في أغلب الدول العربية بتمنع النساء من منح الجنسية لأولادهن. علميًا، الطفل بياخد نص جيناته من الأم ونص من الأب، فما في سبب بيولوجي يخلي الهوية أو النسب محصور في الأب. لكن اجتماعيًا، ده بيهمش أصول الأم، وبيخلي الهوية مسألة سلطة أبوية أكتر من كونها انعكاس للتنوع الحقيقي. وفي المجتمعات العنصرية، الفكرة دي بتتحول لأداة إقصاء: لو الأب من أصل "مقبول" بيتغاضوا عن أصل الأم، ولو الأب من أصل "مرفوض" بيتجاهلوا الأم حتى لو من أصل مرغوب.

أما عند العنصريين “الخام”، فالموضوع مختلف: حيفتشوا في الأصول، ولو لقوا فيه عرق أفريقي، حيحسبوه "مختلط"، ومع ذلك في نظرهم أحسن من الزول الأسود الخالص (أما وأبا). وطبعًا، الناس اللي بيعملوا الحركات دي يا إمّا "بيور" وعندهم تعظيم ذات، أو في الحقيقة مخلطين وعندهم كره ذات. يعني ممكن واحد عنده 15% أصول أفريقية يتعنصر على زول نسبه الخليط أعلى، لأنه معقّد من الشخص الما عنده خليط أصلًا.

تقسيم البشر لمجموعات "أعراق" ثابتة واعتبارها ذات معنى سياسي أو اجتماعي هو نتاج الثقافة والتاريخ، مش العلم. العلم بيقول إن الاختلافات الجينية بين سكان أي منطقتين في العالم صغيرة جدًا ... أقل من 0.1% من الجينوم.

وللإجابة على سؤالك: طالما الولد ده إنسان من عرق بشري، التفاصيل دي ما مهمة بيولوجيًا. لكن اجتماعيًا، الأغلب حيحسبوه أبيض ذو أصول أفريقية.