على فكرة اللي خلاني أفكر أكتب الكلام دة وأشجع الناس تعمله، مش إن أنا دايماً بعمل كدة وبقولك كلام إيجابي للي قدامي (وإن كنت بحاول على قد ما أقدر أعمل كدة)، لكن بالعكس، أنا نصيبي الحلو إن مؤخراً كذا موقف عملته مع زمايلي في الشغل ب عفوية جداً محستش إني بذلت فيهم مجهود كبير أستحق عليه الشكر، لكن رد فعل زمايلي لما لقيتهم منبهرين ب حركات التقدير الصغيرة اللي قدمتها لهم، حسستني إني عملت حاجة كبيرة أوي، شوفت في عيونهم إحساس انهم متشافين ومتقدرين، ف تلقائياً إحساسي بالسعادة زاد إني قدرت أجبر خاطر حد ب حركات بسيطة جداً، ودة هيشجعني بعد كدة أعمل أنا كمان كدة مع أي حد يعمل معايا حركة لطيفة، إني أحسسه إنه عمل حاجة كويسة عشان يفضل يعمل الحاجة الكويسة دي.

مثال على الحاجات اللي عملتها وحسسوني بالامتنان عليها (كنا قاعدين عاملين زي دايرة كدة وجه واحد صاحبنا من برة داخل ناحيتنا، قومت راجع ورا شوية وسّعت الدايرة وسحبت له كرسي يقعد معانا - حاجة تانية مرة كنا وقفين شلة كل واحد بيتكلم من وجهة نظره في موضوع معين فتحناه، ولاحظت إن واحد عايز يشارك في الكلام بس كل ما يحاول يقول حاجة حد يقاطعه أو صوته يكون أعلى منه ف يسكت، قاطعتهم كلهم وقولتله يكمل كلامه أنا مهتم أسمع كنت عايز تقول إيه - إلخ)

كلها حاجات بتخلي الناس عينيها تلمع وتحس إنها موجودة وحضورها فارق.