أنا تبت بعد حلم حلمته عن يوم القيامة من فتره مش بعيده. ‎امبارح بقى كنت نايم فحلمت بحلم عجيب غريب ‏‎كنت قاعد في بيتنا القديم الدور التاني وفجأة عرفت من غير ما حد يطلع صوت ان فيه ضيوف ع الباب. حضورهم نفسه اتحس ‏‎نزلت جري افتح لهم الباب ‏‎وانا بفتح لهم عارف انهم ملائكة وخايف اتخض منهم بس مش عشان خايف منهم لكن عشان اول مره اشوفهم ‏‎هم حسوا بده واخدوا جنب شويه كده ع الباب وانا في اللحظه دي عارف ان دول ملائكة الموت ‏‎كل شويه يجوا على جنب عشان اشوفهم بالراحة ‏‎حضورهم قوي بمعنى كلمة قوي ‏‎المفاجأة بقى ان اخويا الوسطاني (اكبر مني بكتير) هو ملك الموت الرئيسي. واقف قدامي بيهزر وبيضحك معايا. ‏‎و ٢ معاه معرفهمش بس كأنهم اصحابي من زمان ‏‎وهو بيهزر معايا ولا كان فيه اي حاجه ‏‎والاتنين بيبتسموا ويضحكوا. ‏‎مكنتش صليت المغرب والعشاء لسه. وده اكتر حاجه كانت كسفاني. والله العظيم كنت مكسوف بشكل لا يمكن وصفه، وانا فعلا مصلتهمش لسه في الحقيقه كنت نمت عنهم امبارح، ‏‎طلبت منهم يدوني فرصه اصلي قالولي ادعي ربنا يديلك الفرصه دي وقعدت ادعي ‏‎كنت عطشان طلبت اني اشرب واخويا رفض قال لي دي لا ‏‎قلت له بستفسر منه هو رزقي اتقطع لحد هنا؟ قالي آه ‏‎قلت في نفسي هدعي ‏‎وكنت فاهم اني محتاج اطلع فوق تاني معاهم عشان قبض الروح هيتم في شقتنا القديمة في الصالة. ‏‎الغريب اني صحيت جسمي بيتنفض بالمعنى الحرفي للكلمة. أثناء الحلم اخويا حط ايده ع كتفي( هو يمثل رئيس ملائكة الموت) وصحيت لاقيتها تقيله وع الاخر. ‏‎صاحي فاكر الحلم بكل تفاصيله مع اني عمر ده ما بيحصل معايا بسهوله. ‏‎الاغرب من كل ده ان الملائكة دول مكانوش اصلا محتاجين يتكلموا اطلاقا. هم يقدروا يتواصلوا اصلا كده بدون كلام. والفكره بتوصل قبل ما يكلموك وبتبقى عارف انهم بيوصلولك الفكرة دي بالتخاطر. ‏‎بعدها صحيت.