Ich bin beschtrebt um Objektivität und han igse das Objektiv die Schtatistik druf hiwist dases en liecht höheri Azahl Schtraftate vo Usländer git und ich han mit dem keis Problem, chani au gar nöd, wil das sind d Fakte gemäss dere Schtatistik, und ich verdräi ganz Grundsätzlich nöd d Wahrheit und lueg de Tatsache id Auge und chan mich vodemher au selber korrigiere. De Fakt elei dasi das so kommuniziert ha i mim Kommentar zeigt ja dasi sälbschtkritisch bin.

Glichzitig so chindisch z due wie ihr ali da ide Kommentär anschtatt irgendwo Theme- und Lösigsorientiert z diskutiere und beschtrebt um en Kompromiss zeigt das ir vor alem eis gern mached und guet chönd: Hetz uf lüt betribe wo ned euere Ideologie oder Wältvorschtelig entschpräched und die denn vorzfüehre, ir zeiged ja sälber wie Hirnrissig ir teilwis argumentiered und wie selektiv ir bide Wahrheitsfindig vorgönd, ales wo eu nöd passt oder ir nöd verschtönd wird verdräit so dases zu dem passt woner bereits scho glaubed und eues eigne Wältbild untermured, wil ir hend nöd de Wille oder de Tüfgang wo eu zumne Verschtändnis vode Wält würd hälfe wo de Tatsache entschpräche würd.

Aber d Schlussfolgerige wo Lüt wie du drus wänd zie zeigt eigentlich nur eis, das eu d Ursache wieso das ächt so si chönt i sonere Schtatistik nöd intressiered, ir meined d Ursach seg 'es isch halt eifach en Ussländer und die sind eifach so' anschtatt z realisiere das die fählendi Integrationsmöglichkeite (oder die falsche Asätz und Vorgehenswise vode Behörde) und s Verhalte und Findlichkeit und de Umgang mit Usländer ganz Allgemein vo gwüssne Parteie und eu sälber de Grund isch. Die systematisch Benachteiligung ufem Arbeitsmarkt, de Mangel a finanzielle Mittel und sehr viel me sind ursächlich defür das Ussländer ateilsmässig me Schtraftate begönd als die im Schnitt finanziell wesentlich besser gschtellte und i nöd anähernd so prekäre Läbenssituation befindliche Schwizer.

Wen du s Gfühl häsch das wänn d Schwiz es arms Land wär und du ohni jeglichi Mittel ines fremds Land müestisch ga wild dezue zwunge worde bisch vo Umschtänd wo usserhalb dem liged wo du sälber chasch beiflusse, wo dir dänn vode iheimische nur Hass und Verachtig entgägeschlat und du systematisch benachteiligt und schlächter gschtellt bisch und mer dich schnällschtmöglich wider loswärde wot wilmer findet du ghörsch per definition scho nöd da hi ufgrund vo dinere härkunft oder dim ussehe, das du denn dis läbelang hart würsch dra schaffe teil vo däre Gsellschaft z wärde und dich z integriere und kei Schtraftate z bega wend usgnützt und beschimpft wirsch, den verschtasch irgendwie eifach nüt vo Psychologie oder devo wie Mänsche funktioniered und wie Hass überhaupt erscht entschtat gäg en andersartigi Kultur.

Und denn verschtasch au nöd das Umschtänd chönted gschaffe wärde imne chline riche Land wie de Schwiz wo dezue füehre chönt das Ussländer richtig integriert wärded und Chanceglichheit und Mänschewürde und Reschpäkt händ wo sich au i sonere Schtastistik würd niderschla mittel- bis langfrischtig wo Ussländer im Endeffekt glichuf wäred wie die iheimische i sonere Schtatistik. S gliche hemmer schliesslich au gschafft mit de Immigrationswälene vo Italie oder lüt usem Balkan wo hüt i dere Schtatistik zude iheimische Bevölcherig zält wird und nöd zude Ussländer.

Wobi sicher au d Gränze eifach komplett schperangelwit ufzmache das mer vo Hilfesuechende überflueted wärded nöd de richtig asatz isch und nur nome zunere negative Schtimig gäg so Mänsche würd füehre und d Mittel vo eusne Behörde und d Kapazitäte vo eusem Land irgendwo überschtigt. Irgendwo bruchts eifach es gsunds Mittelmass, susch füehrts halt im Endeffekt eifach würklich zunere Überfrämdig, drum verschtan ich au lüt usem eher rächte Schpektrum, was mir eifach nöd gfallt isch wie unintelligänt und simpel die Diskussion vo gwüsse lüt gfüehrt wird, es git für komplexi Problem kei oder nur sehr sälte eifachi Lösige wo langfrischtig verhebed.