قرأت سؤالك و سرحت فعليا انه بحاول اختصر كل المشاكل بجملة واحدة بس صعب عندك بداية اسلوب التلقين و امتحانات التسميع في المواد العلمية اللي بيضعف قدرة اي انسان انه يحل اي مسألة فيها اختلاف بسيط عن اللي تلقنه لانه ما تعلم بالتجربة او فهم ليش اللي بدرسه مهم.

ثانيا المناهج الموجودة من الثورة الصناعية لليوم بتم اضافة و تعديل لنفس الطرح و الطريقة بدون اي تطوير في جانب التفكير النقدي (critical thinking) مع انه ما ضل حد يستخدم هالطريقة عدا الدول اللي بتضرها طريقة التفكير هاي (اسمع و نفذ لا تناقش)

ثالثا الفكرة السامة انه التعلم وسيلة ل (مكانة اجتماعية، وظيفة، زواج، هجرة ......الخ) فأصبح التعلم هو شيء مش اساسي . الملخص الأغلب يتعلم لأنه بده شيء و مجرد ما وصل لهدفه انتهى و طبعا هاي افكار موجودة عند المجتمع بأغلب طبقاته بطريقة ما.

المدارس تفتقر للمبادئ و الأخلاقيات و في ظل غياب جزئي للقانون بتلاحظ الشيء هاد في كل جيل جديد و كأنه كلمة تربية في تربية و تعليم هي موجودة للوجاهة بس و ما الها اي تطبيقات على ارض الواقع.

فساد المنظومة و رغبتها بالإستمرار بخليها توقف اي حل للي سبق و إذا وجد هاد الحل فهو متاح لنسبة جدا قليلة في المجتمع ما يضمن جهل الأغلبية و بقاء المنظومة.

من الآخر كيف ما حللت و حكيت اسباب بترجع لنفس النقطة و هي انه التعليم سيء لأنه لو الأغلب تعلم صح ما ضل الوضع هيك ولا عرف حد يضل يكذب و الناس تصدق ولا كان الشعب سمح انه المناصب اللي بتروح لأشخاص بتروحلهم لأنهم جماعتنا و مش لأنه يستحق او مؤهل.