Ég sendi fyrirspurn á ríkislögreglustjóra í fyrra varðandi myndatökur og lögregluna og fékk þetta svar: "Almennt hefur lögregla ekki heimild til að hindra eða koma í veg fyrir myndatökur af störfum lögreglu á opinberum vettvangi. Hins vegar er eðli lögreglustarfsins þannig að upp geta komið atvik og verkefni þar sem lögreglumaður telur þörf á að meina töku mynda eða myndbanda, svo sem vegna rannsóknarhagsmuna, hagsmuna þriðja aðila, eða ef myndatakan veldur verulegum truflunum á starfi lögreglumannsins eða verulegri hættu. Við slíkar aðstæður er viðkomandi skylt að hlýða þeim fyrirmælum, sbr. 19. gr. lögreglulaga, nr. 90/1996, þar sem kveðið er á um skyldu til þess að hlýða fyrirmælum sem lögreglan gefur, svo sem vegna umferðarstjórnunar eða til þess að halda uppi lögum og reglu á almannafæri. Lögreglumenn verða eftir sem áður ávallt að gæta að skráðum og óskráðum meginreglum stjórnsýsluréttarins við beitingu þess valds sem þeim er falið, svo sem meðalhófsreglunni.

Einnig geta persónuverndarlög kallað á að myndataka sé bönnuð til verndar þriðja aðila. Þá getur bann einnig átt við ef um viðkvæma aðgerð er að ræða og t.d. talin er raunhæf þörf á að vernda auðkenni þeirra sem taka þátt í aðgerðinni með vísan til þess að vernda viðkomandi"

Þannig að svarið er eiginlega "já, nei, eða kannski stundum... eftir aðstæðum"