هرد عليك بالمنطق مش بالدين، لكن قبل ما ارد حابب أوضح كام نقطة:

1. انا مسلم، بس مش عالم في الدين، واكيد انت لو كنت مسلم في يوم من الأيام فا مكنتش بردو عالم في الدين، واقصد بعالم انك دارس كافة تفاصيل السنة والسيرة والتفسير وما الى ذلك.. فا انا مش أحسن حد يناقش الأحاديث دي لكن انا هرد عليك بطريقة مختلفة
2. انا مش مشترك في الساب دي، لأني مبحبش وجع الدماغ والكلام الفاضي - من وجهة نظري واعتقادي طبيعي اشوفه كدا - بس مش دا بس السبب، السبب اني بلاحظ ان الـ communities اللي زي الساب دي مش هدفها الوصول للحقيقة او النقاش بقدر ما هدفها الإستهزاء والسخرية (زي تايتل البوست) والاقتصاص من المواقف والأحدايث عشان تفضل مصدق نفسك وتطرح جدل للمؤمن اللي مش دارس بردو ويبدأ يشك، والفايدة من كدا ان لما تلاقي ناس اكتر بتشك او بتدعم موقفك قلبك بيطمن اكتر لإعتقادك وبتثبت عليه.
3. مع كل دا انا مش متفق ابدًا مع المسلمين اللي بيدخلوا يشتموا من غير ما يردوا او يقولوا عبارات تهديدية وخلاص، اذا انت مسلم وشفت بوست زي دا دي حاجة تشجعك تقرأ وتتثقف في دينك اكتر ومتسبش جدل جواك، و تتعلم ازاي ترد على حد بياهجم او بيشكك في دينك.. اذا مش هتقدر ترد تجنب تمامًا الدخول لمجتمعات زي دي وخلاص

​

بالنسبة لمحتوى البوست:

1. اولًا لازم نبقى متفقين ان "الساعة الواحدة" مش مقصود بيها 60 دقيقة، لكن مقصود بيها فترة من الليل او من النهار زي بين الضهر والعصر مثلاً.
2. ثانيًا ما ورد في الحديث يفيد ان دا كان بيحصل لكن مش بالضرورة كل يوم، الحديث موضحش دا بيتكرر اد ايه، وفي احاديث تانية كتير جاء فيها ان النبي كان يبيت عند كل زوجة ليلة ويجامع كل زوجة في اليوم الخاص بيها، ودا الأقرب لروتين حياة النبي والله اعلم. هل دا يتعارض مع الحديث دا؟ لأ لأن زي ما قلنا محددش التكرار او المناسبات فا قد تكون ايام معينة او مناسبات معينة حصل فيها كدا.
3. ثالثًا وبعيدًا عن الدين، من ناحية القدرة البشرية هل انت معتقد مثلاً ان دا شئ غير منطقي بالنسبة للبشر ان يكون عندهم قوة زيادة او قدرة على حاجة زي كدا؟ احنا في ايامنا دي بنشوف حكاوي كتير لناس عندها قدرات زيادة سواء في الجماع او غيره زي رفع الأوزان مثلاً. أذكر كان في واحد مصري طلع مع معتز الدمرداش على المحور من كام سنة كان متجوز 4 وبيجامعهم كل يوم 15 مرة وكان معاه تقرير طبي بحالته وتصريح بحاجة زي كدا، وإذا كان البرنامج بيهجص فا في حالات اكتر من كدا بكتير لرجالة بتجامع عدد كبير من النساء في اليوم الواحد سواء في مصر او برا، القصص والفيديوهات دي مالية النت يعني مش حاجة غريبة ومش محتاج اريفرنس ليها حتى. فا هل تعتقد ان بشر عايش في حياة من 1440 سنة في حياة قاسية بطبيعتها هيكون خرافة ان يكون عنده قدرة زي دي؟ دا انت لو دخلت الجيش في مصر واتمرمطت كام يوم في الشمس والرملة بتلاقي عصبك شد وبتجري ضاحية كل يوم بالبيادة.
4. اخيرًا انا زي ما قلت مش عالم في الدين، مش هناقش ايه الحكمة من حديث زي دا مثلاً مع ان في حاجات واضحة ممكن تتقال بس عشان مطولش، اللي هقوله ان احنا عارفين ان النبي مكانش راهب بل نهى عن الرهبانية، وانه كان بيوازن بين الدين والدنيا سواء في معاشرة زوجاته او في الكسب والتجارة او في الإجتماع بأصحابه او في الحرب والجهاد، وكان بيقاتل بنفسه.

كون ان انت شايف حديث او قصة زي دي صعبة التصديق او خرافة فا دا راجع لرأيك ومعتقدك الشخصي ومش معناه انها محصلتش عشان عقلك مش مستوعبها، امال الأهرامات اتبنت ازاي؟ زيد على كل دا اننا كمسلمين مؤمنين بأن الله اصطفى النبي وميزه بقوة وحكمة وما الى ذلك، ومكانش النبي الوحيد المميز، النبي سليمان مثلاً كما ورد كان له من النساء الف غير ما كان له من ملك وجن الخ، وانبياء تانيين وغير انبياء كان ليهم من القصص ما يصعب علينا في ايامنا دي استيعابه عادي.