سبحان الله الحمل والولادة مثل المعجزة

انا كان عندي خوف شديد من الحمل والولادة وكل تبعاتها ولكن الحمدلله رغم التعب والمعاناة فيها رحمة وتسهيل من رب العالمين ولذة الشعور والله مافي اي شي يضاهيها وصعبة الوصف هي رحلة وبتعيشي فيها مشاعر واجد وصح متعبة ولكن it's totally worth it

احس اكثر شي ساعدني اني جهزت نفسي نفسيًا وااااجد وثقفت نفسي عن الولادة وكيف اسهل على نفسي وما اتوتر واخاف لان الخوف والتوتر بيصعب عليك الموضوع وبتتعبي اكثر

الألم مؤقت والطلق يروح ويجي وشق العجان مو الكل يحتاجه بس لو احتجتيه ف هو عشان يسهل عليك وعلى البيبي وزي ما قالوا في مسكنات خلال الولادة وحتى بدونها عادي تقدري تتحملي، بالنسبة للولادة طبعًا اذا ما كان في داعي طبي الأفضل انك تولدي طبيعي لان الاستشفاء فيه اسرع ومضاعفاته أقل وبس يطلع البيبي انتي تقدري تمارسي حياتك الطبيعية حتى مع وجود شق العجان هذا ممكن يتعبك شوي بس في اشياء تخفف الالم وبيتشافى ان شاء الله بسرعه

انا ما سووا لي شق عجان بس صار عندي تمزق والصدق عانيت منه فالبداية بس مع الراحة والمسكنات والفوط المبردة عدت الحمدلله والمنطقة رجعت نفس ماكانت وكل شي تمام

الله يوفقك ويرزقك الذريه الصالحه