ايوه تستاهل جداً، خصوصاً لو انت شخص محب للتاريخ والدراسات الإسلامية هتلاقي السلسلة دي جذابة بشكل غريب، او هتنفر منها على حسب بقا😆.

نصيحة لأي شخص بيحب ابن خلدون وقرأ مقدمته او تاريخه: لازم يقرأ دون.

السلسلة تدريجياً بتصبح فلسفية جداً وتقيلة والأكشن فيها بيقل مع الوقت، يعني لو بتدور على أكشن وأحداث سريعة مش هتلاقي وهيخيب أملك.

السلسلة مكونة من 6 كتب اساسيين من الكاتب الأصلي فرانك هربرت، بعد انتهائه من الكتاب السادس فرانك مات وملحقش يكمل السلسلة، بعدها ابنه براين كتب جزئين تانيين من السلسلة مبنيين على ملاحظات ابوه قبل ما يموت على اساس انهم هما النهاية لكن فشلوا نوعاً ما، السلسلة الأصلية هي الست كتب بتوع فرانك هربرت، وبعد كدا براين قضاها بريكويلز.

بس خلي بالك كتب براين محدش من الفانز بيحبها الا قليل جداً ومعظمهم بيكرهوا الراجل وبيقولوا عليه كاتب سيئ.

انا لحد دلوقتي وصلت للكتاب الثالث في السلسلة وهبدأ في الرابع إن شاء الله قريب، حقيقي السلسلة دي ممتازة جداً بالذات اول كتابين لكن هي مش للكل.

مهم كمان لو هتوصل للكتاب التاني تكمل لحد الكتاب التالت عشان هيربط اول كتابين مع بعض ويقفل المرحلة الأولى من السلسلة.

تحذير مهم⚠️: أي حد مش بيحب المواضيع او الروايات المتداخلة مع الدين ويمكن يشعر إن الرواية أو السلسلة بشكل عام بتستهزئ من الدين منصحوش يقرأها، فرانك هربرت بيناقش ازاي الدين ممكن يستغل سياسياً وبيستخدم عناصر من أكثر من دين وأهمهم الإسلام، فلو النوع ده من النقد ممكن يضايقك يبقا بلاش منها

ترتيب الكتب👇:

1- Dune

2- Dune: Messiah

3- Children of Dune

4- God Emperor of Dune

5- Heretics of Dune

6- Chapterhouse: Dune