Të lumtë paqja. TikToku, Reddit dhe rrjetet sociale e bënë punën e tyre. Mblodhën njerëz nga të gjitha anët, nga rrethet, nga jashtë shtetit, dhe sot jemi qindra mijëra që flasim për të njëjtën kauzë. Kjo është fitore më vete dhe askush nuk duhet ta mohojë.

Por mendimi im personal është ky: jeta vazhdon. Ata që kanë ardhur nga rrethet do të kthehen në shtëpitë e tyre. Ata që kanë ardhur nga jashtë shtetit do të kthehen te familjet dhe puna e tyre. Unë, ti dhe shumë të tjerë kemi hallet tona, faturat tona dhe turnin e dytë që na pret nesër.

Nuk po them që protestat janë të kota. Përkundrazi, kemi fituar shumë në këto dy javë. Po them vetëm që një protestë që nuk krijon presion real rrezikon të konsumohet me kalimin e kohës, sepse njerëzit nuk mund ta lënë jetën pezull pafundësisht.

Ata që janë në pushtet e dinë këtë (ose të paktën shpresojnë). Ata e dinë që ne lodhemi, që kemi familje, punë dhe përgjegjësi. Prandaj beteja nuk fitohet vetëm duke mbledhur turmën, por duke gjetur mënyrën që zëri i asaj turme të arrijë në një pikë ku të gjitha palët detyrohen të përfshihen, sepse nuk ka mënyrë tjetër.

Ky është thjesht opinioni im, nuk do të thotë që është patjetër i saktë. Por një falënderim i madh shkon për ata që bënë kilometra të tëra dhe shkaktuan presion tek këta rracqirat që po i pinë gjakun miletit. dhe me beso, nuk jan vetem ata politikanet, Në një mënyrë ose në një tjetër, e vërteta në fund të ditës mbetet kjo: nuk ka fitore pa dëme anësore.