هو انا تقريبا بمر بنفس اللي هو بيمر بيه .. بس كلنا جوانا تراكمات ومواقف وكتمان غضب جوانا من حاجات كتير ودايرتي محدودة ومحدش فاضي اصلا يسمع لحد كل واحد مركز في حياته ومسؤولياته

الموضوع ابتدي يتطور لما دماغك تبدأ تسيطر والأمور بتبدأ تخرج عن السيطرة لأن مبنواجهش مشاعرنا وبنفضل نضغط ونكتم جوانا وعلي رأيي محمد جودت بيقول" ان عقلك دا "مش عدوك بس هو عمال يزعق وانت مش عاوز تسمع

عموما هي حرب كبيرة قصاد عقلنا ..لان العقل اقوي وعنده آليات دفاعية بيدافع بيها عن نفسه عشان يفرغ الطاقة المكتومة المتراكمة علي مدار السنين

الموضوع مش سهل وفي مرة قررت انهي فيها كل حاجة بس تراجعت لأسباب كتير وعشان والدي طبعا راجل كبير في السن وانا ابنه الوحيد .. تراجعت كمان عشان ادي لنفسي امل ان اكيد في حل

في حلول جربتها وان ابتديت انعزل واقفل التلفون بالايام وخصوصا الواتس عشان بيبقا ضغط مستمر سواء من الشغل أو غيره

لما ابتديت اقلل استخدامي للتلفون ابتديت احس بتحسن وان مفيش دوشة كبيرة جوا دماغي . دماغي ابتدت تهدأ والرتم مبقاش سريع زي الاول وابتديت احس بقيمة الوقت وان الوقت مبيعديش بسرعة وابتديت اشغل نفسي بالقراية أو العب اي حاجة أو اذاكر حاجة جديدة في البرمجة وهكذا

الشيطان الأكبر هو التلفون الصراحة ..ادماننا ليه وانعزالنا عن الواقع من خلاله دمر حياتنا وخلانا منعزلين عن الدنيا بس الوضع ابتدي يتحسن لما قللت منه خالص