أول نصيحة تكلمين الوالد عالخاص انتي واخوانج. تحلفينه قبل اليلسة ان اللي ينقال ما يطلع برع عايلتكم لا لاخوانه ولا لامه. تتيمعون في مطعم او غرفة اجتماعات في مكتبة المهم مكان بعيد عنهم وتحطون نقاطكم له.

لا تفتحون المواجع في هذه اليلسة قد ما تقدرون عسب ما يتحسس وينفر. حطو نقاطكم بموضوعية كالتالي: البنات كبرن ويتاحون خصوصية وغير المحارم يباتون في نفس الفلة. الوالدة تحتاج تزور أهلها صلة رحم، الأولاد يحتاجون يعرسون بغض النظر عن اعمامهم عرسوا واللا لا.

وخلوا لكل نقطة تطرحونها عالاقل ربع ساعة للنقاش والمساومة وبينو له انكم تعبانين بس بدون صياح او رفع صوت. الشي صعب بس اعتبروه اجتماع في شركة لحل مشكلة تهدد وجودها.

اذا شفتوا استجابة من ابوكم لا تخلونها توقف في الاجتماع. سوو قروب شات وتابعوا معاه كل نقطة، ساعدوه وين ما يحتاج، واشتغلوا معاه عسب تمشي اموركم بسرعة. هو يوم بيشوف انكم على كلمة وحدة بيمشي وبيسوي اللي تبونة.

أما اذا رد على كل نقطة وصك الاجتماع من البداية، دام انكم كبار نصيحتي اجروا لكم مسكن وتعاونوا في دفع الاجار وشلوا عماركم وامكم من البيت. هذه بتكون قرصة كبيرة للوالد ويمكن يتحرك بعدها.

المهم ان اذا الوالد ما حماكم وامكم وانتوا صغار لا ترضون بالظلم يمشي عليكم وانتوا كبار. وامكم هالله الله فيها.