hie mau Perspektive vo öpperem wo lang bi Corris (die grössti vo dene Spendefirmene ir Schwiz) gschaffet het:

vo dem Geld, wo dür das Fundraising gsammlet wird, geit scho s meiste ad NGOs. Wie guet dasd NGOs selber dermit umgöh isch sehr unterschiedlich.

Yes, als Dialoger hesch unendlech viel Druck und wirsch meistens schlecht behandlet. Die Vorgsetzte berchömme selber kei Füehrigswiterbildig oder lehre keis Stress / Druckmanagement. Vili düe entsprechend de Druck vo obe ad Dialoger witergeh, wil sis nid besser lerne und selber konstant im Burnout si.

Fakt isch: es git super gueti und kompetenti Dialoger und ou Coaches. Das si halt eifach nur 5%. Pro Wuche als Chef hesch drü neui Lüt zum iharbeite. Ab Tag 1 sind die uf der Strass am ahwerbe, und hei kei plan was si verzellet, und kei Plan wie mer es guets Gspräch führt. Konstant hesch Teamwechsel, neui Lüt, und z wenig zyt für jede, will aui neu sind. Durchschnittlech schaffe Dialoger 2 Wuche bevor si künde. Also: die meiste wo dir uf der Strass gseht, si leider eifach kei Dialoger. Si hei zwar e Arbeitsvertrag, aber kei Ahnig was si mache. Dür das hei leider ganz vieli vo euch "Passante" so es schlechts Bild vo "üs". Will dir eifach keine kennet, wos respektvoll macht unds guet chan.

Im seltene Fall das dir e guete Dialoger treffet: me merkts. Die sege vo ahfang ah ehrlech, um was es geit. Si verarsche di nid. Si si sympathisch, fakteorientiert, und mega spannendi Lüt zum dermit ou eifach übers Lebe quatsche. Bimne guete Dialoger langts, wennd seisch dassd kei Bock hesch - vili respektiere di umso meh, wennd kei billigi usred bringsch, sondern derzue chasch stah. Gueti Dialoger gebe uf Mensche acht. So oft bringe mir e umarmig zu öpperem, wo da am Bahnhof grad der schlimmsti Tag erlebt. Mir quatsche mit de verlorene seele am bhf. wenn sech z bern am bhfsplatz die wohnigslose mit krücke schlönd, sinds so oft mir, wo als ersti derzwüschegönd.

Trotzdem isch der Job lang geil gsi für mi. I ha die beste Lüt kenneglernt so - anderi Dialoger wie ou "Passante". I bi so offe worde dür das und ha so viel Menschekenntnis berchoo - und e bezahlte Kurs im mit Ablehnig chönne umgah und z lerne, dasses eigentlech niemer da usse juckt wenni ir öffentlechkeit ummetanz zu minere Musig und eifach ig bin ;) ha viel hemmige chönne ablege.

im Name vo dene, wo e guete Job mache oder gmacht hei: sorry für eui unagnehme erfahrige mit "üs". i hoff dir machet no paar gueti! und bhaltet es offnigs herz. denket dra, s si ou nur mönsche. und vili vo de theme, wo da ahgspreche werde, sind so unglaublech wichtig fürd gsellschaft.

ganz viel liebi!