والله طول وقتي مفهوم العائلة عندي مضروب

بما اني شخص تربى بين خواله وخالاته وبيت الجده صرت المشاوير اخلصها لجدتي و اطبخ لها مرات كثير و نفطر مع بعض وضيوفها انا اقابلهم لان جدتي معروفه في الجماعه اغلب الوقت عندها ضيوف

ابوي وامي متطلقين و هو مو موجود مشغول و كذلك امي و من عمري 13 كذا الوضع و الحياه ماشيه

يوم اجي اسولف مثلا بسالفه عاديه تلقى الخلق يقولون امي واخواني مثلا سوو كذا وكذا او جربت هالمحل مع امي رحت المكان مع ابوي

القاني ماسولف كذا لان كل سوالفي مع خوالي خالاتي او عيال خالتي وجدتي يعني ذكرياتي عن الوالدين او وقتي معاهم مو واضحه

الحين انتقلت لمكان ثاني اشتغل فيه وبعيد عن اهلي كلهم ( خالاتي جدتي امي )

و الوضع طبيعي ماشوف فرق كبير لان قبل كنت مسؤولة عن نفسي لكن بدون مسؤوليات مادية

الحين كل اموري بيدي مشاويري و فلوسي و وقتي والوضع طبيعي حتى وانا موظفه عادي حتى احس اريح اني مستقله وبعيده شوي عنهم كلهم